28.08.2012, 15:25 Новицки уште две години во НБА
„Сметам дека и во овој состав сме кадарни да одиме докрај во шампионатот и да освоиме титула. Што се однесува до мојата кариера, планирам да играм и во наредните две години“, изјави Дирк Новицки
Ретки се оние професионални спортисти кои и во подоцнежните години имаат желба за играње на највисоко професионално ниво.
Типичен пример е ѕвездата на Далас Маверикс, Дирк Новицки, и покрај своите 34 години, сепак, уште две сезони ќе игра во НБА-лигата.
„Сметам дека и во овој состав сме кадарни да одиме докрај во шампионатот и да освоиме титула. Што се однесува до мојата кариера, планирам да играм и во наредните две години“, изјави Дирк Новицки.
Германецот преку социјалната мрежа Твитер им посвети цел еден ден на своите фанови, одговарајќи на најразлични прашања. Едно од најинтересните, секако, беше и она поврзано со Џејсон Тери ветеранот кој летово го напушти Тексас и потпиша за Бостон.
„Со Џејсон, секако, ќе останеме пријатели до крајот на животот. Минавме огромен период од кариерите заедно, а го освоивме и шампионскиот прстен, тоа што ги промени клупските бои воопшто нема да му наштети на нашиот приватен однос“ додаде Новицки.
Новицки ја мина целата своја НБА-кариера во тимот на Далас од моментот кога беше избран на драфтот во 1998 година како деветти пик. Покрај шампионаската титула, освоена во 2011 година, тој може да се пофали и со 11 учества на Ол-стар натпреварите, а беше четири пати избран во најдобрата НБА-петорка.
|
