10.05.2012, 12:38 Јапонската виолинистка Камио го затвора циклусот „Лауреати“
Брилијантната инструменталистка вечерва во Домот на АРМ ќе ги изведе Концертот за виолина и оркестар од Јан Сибелиус и Симфонијата бр. 8 од Антонин Дворжак
Македонската филхармонија вечерва во Домот на АРМ ќе го одржи последниот концерт од циклусот Лауреати. Солист ќе биде извонредната јапонска виолинистка Мајуко Камио, а со оркестарот ќе диригира Емил Табаков од Бугарија.
Брилијантната инструменталистка Камио ќе ги изведе Концертот за виолина и оркестар од Јан Сибелиус и Симфонијата бр. 8 од Антонин Дворжак.
Камио, победничка на меѓународниот натпревар „Чајковски“, е една од најбараните јапонски виолинистки во светот, ексклузивец на издавачката куќа СОНИ Класикс. Настапувала со врвни светски оркестри под диригентските палки на Зубин Мехта, Владимир Ашкенази, Јиржи Белохлавек,... Свири на виолина Страдивариус, изработена во 1727 година, која му припаѓала на легендарниот виолинист и виртуоз Јозеф Јоахим.
Македонската публика имаше можност да го слушне нејзиното мајсторство минатата година кога ја отсвири Шпанската симфонија од Едуард Лало.
Мајуко Камио, родена во Осака 1986 година, дебитира во Токио на десетгодишна возраст под диригентство на Шарл Дитуа. Концертот беше пренесуван во живо од националната телевизија. Од тогаш настапува како солист со оркестарот Тонхале од Цирих и диригентот Елиаху Инбал, Израелската филхармонија со Зубин Мехта, Бостон Попс со диригентот Кит Локхарт и на турнеја со Рускиот национален оркестар диригиран од Владимир Спиваков, Прашката филхармонија, БиБиСи филхармонијата, но и во Јапонија со симфониските оркестри на Токио, Хирошима, Кјото, Осака.
Моментно се усовршува во класата на Захар Брон на Високата школа за музика во Цирих.
|
