Почна самитот на нашите разочарувања

Веројатноста Македонија да биде тема во Лисабон
е многу мала

Самитот, кој толку многу се употребуваше како временски рок дали Македонија ќе тргне напред или не, почна вчера во Лисабон, но шансите за позитивна одлука за нашата држава и пред да почне личеа на илузија. Македонската делегација, во која се претседателот Ѓорге Иванов и министрите за одбрана и за надворешни работи, Зоран Коњановски и Антонио Милошоски, на самитот ќе учествуваат во „втора постава“, како дел од расправата за мисијата на НАТО во Авганистан. Македонија официјално не е тема на агендата на лидерите на Алијансата, а генералниот секретар, Андерс Хог Расмусен, веќе најави дека без решен спор за името нема шанси за прогрес околу поканата за нашата земја да стане членка на НАТО.

Лисабон е третиот самит од април 2008 година, кога Македонија доживеа шок во Букурешт, па молкот што го следеше неговото одржување деновиве покажа колку, само за две години, земјата успеа да се оддалечи од Алијансата. Без решение за името, со илузија дека може да се случи прием со референцата и со најави дека ќе се бара промена на заклучокот од Букурешт, нашата делегација е во невозможна мисија во португалската престолнина. Според најавите, претседателот Иванов ќе ја потврди стратегиската определба за влез во НАТО, но и ќе побара еднаков третман за сите што учествуваат во операциите на Алијансата, уште повеќе што Македонија е на врвот според бројот на војници што се борат под знамето на НАТО.

На состанокот на лидерите на земјите-придонесувачи во мисијата на Алијансата во Авганистан ќе се расправа за обезбедување дополнителни ресурси за потребите на мисијата, а во тој контекст ќе се обрати и претседателот Иванов. На состанокот ќе бидат присутни претседателот на Авганистан, Хамид Карзаи, генералниот секретар на ОН, Бан Ки-Мун, претседателите на ЕУ - Херман Ван Ромпуј, на ЕК - Жозе Мануел Баросо и на Светска банка - Роберт Зелик. Исто така, ќе биде одржана средба на шефовите на делегациите на Јадранската повелба - Македонија, Албанија, Хрватска, Црна Гора и БиХ. Проширувањето воопшто нема да биде тема на самитот, но Македонија ќе се најде во заклучоците со пораката што ни е позната од Букурешт.

На самитот му претходеше силна кампања за поддршка за членство на Македонија од страна на Обединетата македонска дијаспора, која, наспроти контроверзните изјави од власта, обезбеди јавна поддршка од влијателни заедници, конгресмени и политичари во САД, Канада и во Франција. ОМД испрати писмо и до американскиот претседател Барак Обама со барање за јасна и силна порака до членките на НАТО дека Македонија треба да добие формална покана да и' се придружи на Алијансата на самит во Лисабон. Во писмото се истакнува дека, иако Македонија не е членка на НАТО, нејзиниот придонес кон мирот, демократијата, стабилноста и сигурноста во Југоисточна Европа и секаде во светот јасно покажува дека земјата е близок сојузник на САД и оти подолго време се однесува како членка на Алијансата. Засега нема најави дека американскиот лидер, сепак, ќе го отвори проблемот со Македонија во Лисабон.

Се очекува претседателот Иванов во Лисабон да оствари билатерални средби, но со кого и кога се' уште не е најавено. По правило, на самитите на НАТО нашите делегации ги предводеа претседателите на државата, со исклучок на Букурешт каде што, покрај шефот на државата, беше и премиерот Никола Груевски, додека во Стразбур не беше поканет никој од Македонија. (Н.Р.)