Шахистите 38., шахистките 66. на Олимпијадата

Во последното коло машката селекција ја совлада Шкотска, а женската Порторико

Роберт Димитриевски

Машката репрезентација на Македонија го освои 38. место во конкуренција на 157 тима, а женската заврши 66. меѓу 127 селекции на јубилејната 40. Шаховска олимпијада, која од 28 август до 9 септември се одржа во Истанбул. Мажите во 11 одиграни натпревари освоија 13 меч-бода и 25 поени по табли, а дамите 11 меч-бода и 21 поен по табли.

Во последното коло избраниците на капитенот Драгољуб Јаќимовиќ, кои го почнаа турнирот како 49. според рејтингот, ја совладаа Шкотска (65.) со 2,5-1,5. Резултатот го отвори интермајсторот Филип Панчевски (рејтинг 2461), кој ги искористи белите фигури на последната табла против ФИДЕ-мајсторот Алан Тејт (2332). Тоа се покажа и решавачко за конечниот резултат, бидејќи во продолжението речиси во исто време ремизираа велемајсторот Владимир Георгиев (2566) со ВМ Колин Мекнеб (2446) на првата, ВМ Трајко Недев (2494) со ВМ Кетеван Арахамија-Грант (2421) на втората и ВМ Влатко Богдановски (2448) со ВМ Џон Шоу (2424) на третата.

Женската селекција, пак, во последниот круг славеше со 2,5-1,5 против Порторико, 22 места подолу рангиран од составот селектиран од Ристе Менкиноски, кој ја почна Олимпијадата од 68. позиција. На половина од натпреварот водство на Македонија и' донесоа Драгана Николовска (1828) со победата со црни фигури над ЖФМ Орта Џо Ен Алварез (1753) на последната табла и Бојана Бејатовиќ (1978) со ремито со ЖФМ Ринели Комас Колон (1810) на втората. Триумфот го обезбеди Моника Стојковска (1939), која уште во претходното коло освои норма за женски ФИДЕ-мајстор и која ја принуди на капитулација Хилзандрили Пачеко Медина (1820) на третата. На крајот ЖИМ Габриела Коскоска (2094) на првата загуби од ЖФМ Даница Васкез Макарини (1916).

Олимписки шампион кај мажите стана Ерменија, сребрениот медал и' припадна на Русија, а бронзениот на Украина. Кај жените триумфира Русија, пред Кина, а трета е Украина.

Резултати од последното коло, мажи: Украина – Кина 3-1; Унгарија – Ерменија 1,5-2,5; Русија – Германија 3-1; Полска – САД 1,5-2,5; Аргентина – Холандија 1-3; Виетнам – Узбекистан 3-1; Романија – Филипини 3-1; Куба – Словенија 2,5-1,5; Азербејџан – Индија 1,5-1,5; Англија – Чешка 2,5-1,5 итн.

Конечна табела: Ерменија 19 меч-бода, Русија 19, Украина 18, САД 17, Кина 17, Холандија 16, Виетнам 16, Романија 16 итн.