Рекоа за Коле Чашуле

Гане Тодоровски, писател
„Црнила“ има универзални пораки

„’Црнила‘ на Коле Чашуле стана една од визите за регуларниот пробив на македонската литература кон малечките синори на нејзиното јазично подрачје.

Чашулевите ’Црнила‘ имаат свој конкретен и универзален историски контекст. Драмата на Курдите, трагиката на Палестинците, пукотниците во Либан, виетнамската кланица, грчот на Ангола, недоумицата на Португалија-зарем не е сето тоа една проширена рамка на црната тема на расчовечувањето по пат на братоубиства, зарем сето тоа не е потврда за универзалноста на Чашулевата порака во ’Црнила‘?

ЉупЧо Георгиевски, режисер
Живот посветен на еден идеал

„Кога размислувам за Чашуле и неговото дело, ми се наметнува една мисла дека Чашуле најдлабоко влезе во мракот на македонското битисување, обидувајќи се да го разгонетне проклетството, или судбината на Македонецот. Сиот свој живот да го посвети во борбата за еден свој идеал, а потоа да го уништи или да го убие тој свој идеал. Творештвото на Чашуле се обидува да најде одговор на ова прашање. Се разбира до ден денес, како што гледаме, нема одговор на тоа прашање. Друго што исто така ми се наметнува од творештвото на Чашуле, е една негова мисла во ’Суд‘, дека овде во Македонија се уште само смртта е доказ за својата правина. За жал, еве Чашуле и со својата смрт тоа ни го потврдува“.

Сашо Миленковски, режисер
Тој и понатаму е жив на македонската сцена

„Коле Чашуле е еден од првите директори на Македонскиот народен театар и автор на првиот граѓански текст во историјата на македонската драматургија ’Вејка на ветрот‘. Коле Чашуле е автор кој е се уште жив на сцените на МНТ. Минатата година ја поставивме ’Вејка на ветрот‘, а годинава почнавме со подготовките на ’Суд‘. Без оглед на физичката смрт, тој и понатаму е жив на македонската сцена“.

МатеЈа Матевски, писател
Сериозен продор во современоста

„Со ’Вејка на ветрот‘ во драмскиот опус на Коле Чашуле навлегува големата тема на македонските црнила од Константин и Прличев до Чернодрински и Рацин и

Чашуле години на ред ќе ја одгледува и афирмира. Со ова дело тој се обиде во домашната драма да донесе еден посериозен продор во современоста и преку односот кон мотивот, и преку сценската разработка и преку јазикот. Од овој аспект треба да се гледа пораката што тој ни ја донесе преку судбините на неговите трагични ликови и преку новата боја на нивниот, на нашиот македонски говор на сцената“.