Мое ќоше

Социјалдемократите како вмровци

Ерол Ризаов

Бранко Црвенковски одбра како црвен пипер да се вмеша во манџата што ја зготвија ДУИ и ВМРО-ДПМНЕ

Многу почна да им се бендисува на социјалдемократите вмровскиот патриотизам и популизам. Се' повеќе личат на нив. Собираат евтини поени на теренот на меѓунационалната омраза. Ја губат тешко освоената и скапо платена позиција на носители на соживотот во Македонија. Прилично излигавено изгледаат деновиве во парламентот кога земаат збор да објаснат како ќе гласаат за Законот кој предизвикува жестока меѓуетничка поделба меѓу Албанците и Македонците, а демек истовремено се против политиката на ВМРО-ДПМНЕ. Од поодамна гледам како во главите на најголемите социјалдемократи клечи по еден вмровец. Секогаш карикатуралноста и гротеската на македонската левица доаѓа до целосен израз кога некој сака да изигрува поголем католик и од папата. Старата сдсмовска болест автоматски се активира штом се одлучува за крупни меѓуетнички прашања. Примамливоста на национализмот им го свртува умот, па дури и се гордеат со тоа. Од она што паметните се срамат, будалите се фалат.

Навистина социјалдемократите беа во деликатна ситуација, кој пат да го фатат. Ако не го поддржат Законот за бранители кои самите го предлагаа, ќе загубат многу во очите на поголемиот дел од јавноста. Соочени со дилемата дали да застанат во истите редови со ВМРО-ДПМНЕ кој по шест години владеење најлицемерно сега го активираа Законот за бранители како одговор на инцидентот во Слупчане, што им го приреди нивниот партнер во власта, или да им дадат поддршка на ДУИ и ДПА, социјалдемократите одлучија да играат на националната карта. Кога голема национална политичка партија како што е СДСМ, ќе се соочи со ваков предизвик логичен е изборот на нивните водачи да ги покажат своите вистински демократски капацитети. Тие дострели се потпираат на доктрината да се осудува туѓиот национализам. Како во оној виц: најмногу мразам национализам и шиптари. Така Бранко Црвенковски и неговите демократи одбраа како црвен пипер да се вмешаат во манџата која ја зготвија ВМРО-ДПМНЕ и ДУИ. Со тоа социјалдемократите се доведоа во крајно глупава губитничка ситуација да договараат предизборна соработка со албанските партии, а да гласаат заедно со ВМРО- ДПМНЕ за усвојување на Законот за бранители. Никола Груевски и овојпат ги обработи како бавча.

СДСМ не ја виде најкоректната позиција во ваква деликатна ситуација и покрај големото политичко искуство на Бранко Црвенковски. Секогаш и секаде во светот кога се работи за чувствителен закон кој може да предизвика затегнување на односите во државата, опозицијата има далеку подобра позиција и помала одговорност ако со право побара прво да се постигне консензус кај владејачките партии, па потоа да даде поддршка на тоа што тие ќе договорат. Тие што го замесиле тестото треба да го испечат и лебот. Тие што го создале проблемот треба да ги расчистат работите. Вака СДСМ боси по трње се втурнаа во освојување политички поени на шовинистичка агенда која ќе им се удри од глава. Го имитираат ВМРО-ДПМНЕ на најлошата негова доктрина, примитивен популизам и националистичка кохезија. Навистина не е јасно како Црвенковски покрај гласовите на Македонци очекува и албански гласови на евентуалните предвремени избори ако гласа како трабант на ВМРО-ДПМНЕ на нешто што ги избезумува Албанците. И уште нешто многу важно што покажува дека СДСМ прилично необмислено го зема жарот во раце кој го разгореа ДУИ и ВМРО-ДПМНЕ. Евентуалните нови прегрупирања во парламентот за ново мнозинство потпрени на легитимни изборни резултати признати од сите учесници на последните парламентарни избори, со гласање недоверба на Владата стануваат неможни со ваквата позиција на Бранко Црвенковски и на СДСМ. Дури и постизборните коалиции ако дојде до предвремени парламентарни избори, прилично ги затвараат вратите за коалиции со албанските партии ако СДСМ не е апсолутен победник, што во овој сегашен однос на силите, сметајќи и на најповолните истражувања на јавното мислење не е можно. Дури и кога СДСМ би имал подобар резултат отколку на последните избори што е реално, прашање е дали ќе може да договори коалиција со албанските партии која овозможува мнозинство и формирање влада. По ваквиот хермафродитски о��нос во парламентот, СДСМ се оддалечува од својата главна агенда и покажува слабост несвојствена досега на голема опозициона партија. Ќе речете, па како тогаш ВМРО-ДПМНЕ ќе преговара по евентуалните предвремени избори со албанските партии по ултимативно донесувањето на ваков Закон. На истиот начин како и досега. Сака со ДПА, сака со ДУИ. Никола Груевски ја откри таа формула.