Фаворитите на СДСМ ги ��аваат фотелјите поради партијата

Што ќе работат градоначалниците на СДСМ ако дојде наредба за бојкот на локалните избори во март

Горан Адамовски


Актуелните градоначалници од редовите на СДСМ се подготвени да ја напуштат удобната општинска фотелја доколку партијата го побара тоа од нив. Ако се остварат заканите за бојкот на мартовските локални избори, градските татковци од редовите на опозицијата, со повлекувањето, буквално на тацна ќе им ги предадат функциите на противничкиот табор, иако сите прогнози одеа во прилог на нивен сигурен успех на локалните избори. Да биде сликата комплетна, градоначалниците на Карпош, Струмица, Карпош и Охрид добија согласност од врвот во Скопје да одат по уште еден мандат и за тоа, според анкетите, им се даваат добри шанси, но, како што велат, токму партискиот амин е мотив повеќе да се почитува одлуката на централата.

Зоран Заев, според многумина, е сигурен „фикс“ во Струмица. Неговата популарност во општината би требало да му донесе и трет мандат, иако ВМРО-ДПМНЕ вложува сериозни напори да го добие градот што одамна е во рацете на опозицијата. Новогодишното интервју на Заев за „Утрински весник“, во кое најави оти сигурно ќе победи во Струмица, остави дилеми во јавноста дали фаворитите на опозицијата ќе играат соло доколку раководството на партијата одлучи од страна да ги гледа локалните избори.

„Не заборавајте дека јас сум и потпретседател на СДСМ, така што гарантирам дека апсолутно ќе се почитува одлуката на партијата, во чие донесување ќе учествуваме и ние четворицата актуелни градоначалници на СДСМ. Ако дојде до тоа, јас ќе се вратам во приватниот сектор, ќе ги управувам семејните фирми“, ни изјави Заев.

Кумановскиот градоначалник Зоран Дамјановски објаснува дека тој е предложен како кандидат на партијата, поради што е должен да ја носи судбината на партијата.

„Никогаш не сум дејствувал како изолиран кандидат, односно секогаш сум ја имал поддршката на партијата. Пред да станам градоначалник - бев гинеколог, па според законот, ќе се вратам на старото работно место“, ни рече Дамјановски. Неговите соработници велат дека евентуалниот бојкот ќе значи оти СДСМ првпат од самостојноста нема да го води Куманово, град кој важи за нивен бастион.

Охридскиот „татко“, Александар Петрески, смета дека одржување на изборите без учество на опозицијата би бил нелигитимен и недемократски чин на актуелната власт. И тој ќе ја почитува одлуката на партиското седиште.

„Не е добро за демократијата во земјата на избори да излезат само владејачките партии и нивните приврзаници, бидејќи тоа води кон едноумие“, рече Петрески, оценувајќи дека власта треба да смогне сили и да ги прифати барањата на опозицијата за фер и демократски избори.

Вели дека се' уште е рано да размислува што ќе работи ако не биде градоначалник, но уверен е во своето искуство, цени дека осум години успешно ја водел општината, па нема да биде проблем да се снајде. Пред да раководи со општината, тој беше директор на јавни претпријатија, водеше и приватен бизнис.

Во Охрид се очекува(ше) неизвесна трка меѓу Петрески и фаворитот на ВМРО-ДПМНЕ, д-р Никола Бакрачевски, за кого се говори дека има висок рејтинг меѓу охриѓани. Од општинскиот комитет на ВМРО-ДПМНЕ нагласуваат дека Петрески едвај чека да не се одржат локални избори затоа што тоа, според нив, е единствениот начин да го избегне неминовниот пораз.

Изјава вчера побаравме и од првиот човек на скопската општина Карпош, Стевчо Јакимовски, но не успеавме да стапиме во контакт со него. Нему, наводно, му се предвидува сигурна победа во трката со адвокатката Јагнула Куноска, а и тој неколку пати самоуверено порачуваше оти е уверен во триумф. Низ јавноста веќе се зборуваше оти Јакимовски одбрал да игра на сигурно, преферирајќи го Карпош пред неизвесната трка за Скопје. Евентуалниот изборен бојкот на СДСМ ќе значи губење и на единствената скопска општина што е во нивни раце.