„Депеш мод“, „Рамштајн“, Вотерс, Сатријани во Белград

Српската престолнина веќе ги најави концертите на големите музички ѕвезди кои ќе настапат до крајот на годината

Додека кај нас царува музичкиот молк, некои соседни културни дестинации веќе ја најавија богатата концертна активност која ќе се случува во текот на годината. Во блиската српска престолнина Белград концерти ќе одржат голем број на славни светски имиња и групи, меѓу нив и „Депеш мод“, „Рамштајн“ и Роџер Вотерс. Нашите продуцентски куќи кои се занимаваат со организација на концерти молчат и велат дека не сакаат ништо да откриваат предвреме. Од „Авалон продукција“ ни рекоа само дека сега се ангажирани околу организирање на концертот на „Грин деј“ во Белград, а за Скопје го споменаа само скорешниот концерт на Јосипа Лисац.

Славниот и контроверзен германски бенд „Рамштајн“ ќе настапи на 28 април во арената „Комбанк“, а нивниот концерт, кој се најавува како своевиден спектакл ќе се одржи под мотото „Wir halten das Tempo“. Во изминатите две години, групата настапуваше низ светот и како што ќе напише критиката, секаде ја оставаше публиката без здив. Велат, нивниот концерт не смее да се пропушти, бидејќи „еден е Рамштајн“, а нивните настапи, каде и да се, сигурно ќе останат запишан во историјата, бидејќи тие се ексцентрични и иновативни. Овој секстет постои од 1994 година, а концертите, покрај необичните костими, секогаш се збогатени и со фантастична сценографија, која често е придружена со пиротехника. Нивното мото е: „Работи го тоа што го сакаш и претерувај во тоа“. Иако бендот е дефиниран како да му припаѓа на т.н. индастријал метал, музиката, сепак, е еклектична, полна со жестоки и енергични звуци чии стилови се мешаат, вклучувајќи ги германскиот хард-рок и хеви метал. На членовите на бендот големо влијание ќе изврши култниот словенечки бенд „Лајбах“, не само во звучната, туку и во ликовната естетика, во користењето на симболиката, но и бендовите како што се „ДАФ“, „Министри“ и Мерилин Менсон. Скоро сите нивни текстови се на германски јазик, иако некои од нив имаат верзија и на англиски.

Првпат во Белград концерт ќе одржи светски познатиот британски електронски бенд „Депеш мод“. Електропионерите ќе настапат на 19 мај на „Ушче“ во рамките на европската турнеја со која прославуваат повеќе од 30 години успешна кариера (групата е формирана во 1980 година). „Депеш мод“ оваа година ќе одржат 34 концерти во 25 држави пред повеќе од милион и половина фанови од светот, а почнуваат на 7 мај со концерт во Тел Авив. Љубителите на нивниот звук годинава нестрпливо го очекуваат и најновиот, тринаесетти албум, чие излегување бендот го најавува за напролет. Моментно „Депеш мод“, чија музика е дефинирана како движење од поп, диско, до новиот бран на 1980-тите и потоа до т.н. темен бран на 1990-тите, односно бенд што им припаѓа на њу вејвот и њу романтикот моментно е една од најдолго активните групи на сцената.

Свој необичен и генијален аудиовизуелен проект најавува и англискиот гитарист Роџер Вотерс, некогашниот член на славните „Пинк флојд“, кој ќе настапи на 1 септември на „Ушче“. Оваа година Вотерс триумфално се враќа во Европа со своевидно шоу кое, вели критиката, би требало да потсетува на оние кои своевремено ги правеше најпознатиот бенд на сите времиња „Пинк флојд“. По заминувањето на Сид Барет, Роџер Вотерс беше главниот текстописец во „Пинк флојд“, како и басист и еден од главните вокали. Тој ги осмисли и најпознатите албуми на бендот како „The Dark Side of the Moon“, „Wish You Were Here“, „Animals“ и „The Wall“. Ова враќање на Вотерс на сцената е повторно „The Wall“ („Ѕид“), култната сценска продукција, која тој ја обнови во 2010 година. Сега е редизајнирано и подигнато на повисоко ниво. Инаку, досега е прикажано 192 пати низ светот пред повеќе од 3 милиони обожаватели, а албумот се смета за еден од највлијателните во историјата на поп-културата. Оригиналната продукција на „Ѕид“, пак, од 1980 година, во целост е изведена само 29 пати на турнејата на „Пинк флојд“ со цел да го промовираат албумот и еднаш во Берлин на прославата по повод падот на Берлинскиот ѕид.

Во Белград ќе гостуваат и Џо Сатријани („Сава центар“, 24 мај), кој се смета за еден од највлијателните гитаристи, потоа американската рок-група „Грин деј“ (27 мај, во рамките на фестивалот „Calling“), но и познатиот оперски пејач Андреа Бочели (Белградска арена, 11 мај) со оркестар од Србија. (Т.И.)