11.01.2013, 12:25 Никола Маџиров до нобеловецот Транстромер
Книгата „Остаток од друг век“ („Remnants of Another Age“) е избрана меѓу петте најдобри поетски книги за 2012 во САД според американскиот магазин „Манархи“
Книгата „Остаток од друг век“ („Remnants of Another Age“) на македонскиот поет Никола Маџиров е избрана меѓу петте најдобри поетски книги за 2012 година во САД според американскиот магазин „Манархи“, заедно со „Половина довршен рај“ на нобеловецот Томас Транстромер. Уредникот на листата, Едвард Ратке, пишува дека песните на Маџиров се песни што ја допираат и обземаат вашата душа, кои продираат длабоко во неа, песни кои ги носите со себе со денови, месеци и години. „Прекрасна и хипнотизирачка, оваа стихозбирка го обнови мојот интерес за современата поезија, со која изгубив контакт во последните години. И мило ми е што се случи тоа, бидејќи без оваа книга, оваа листа немаше да постои“, пишува Ратке.
Поезијата од Никола Маџиров е објавена и во најновиот број на „Преари Скунер“ во Небраска, едно од најстарите американски книжевни списанија, кое редовно се печати од 1926 година. Напролет Никола Маџиров ќе одржи поетски читања во Лос Анџелес, Њујорк и во други американски градови.
|
