Мекдоналдс ќе прави француски сендвичи

Американскиот гигант со оваа одлука го напаѓа „споменикот“ на француската брза храна – традиционалниот сендвич „жамбон-фромаж“ (шунка и сирење)

Светскиот лидер за брза храна – Мекдоналдс ќе прави и продава француски сендвичи по цена од 4,50 евра.

Американскиот гигант, 33 години по доаѓањето во Франција, со таа одлука го напаѓа „споменикот“ на француската брза храна – традиционалниот сендвич „жамбон-фромаж“ (шунка и сирење).

Засега менито е пробно и во случај на успех, тоа ќе остане на менито на Мекдоналдс во Франција. Традиционалниот француски сендвич направен со традиоцонален долг леб – „багет“ брзиот ресторан ќе го служи во три верзии со говедска, пилешка и свинска салама плус пијалок, но без пржени компири, сето за 4,5 евра што е една од најниските цени во споредба со истите сендвичи во пекарите, сендвичарите или супермаркетите.

Франција е најголемиот пазар за Мекдоналдс по американскиот со вкупно промет од 4,19 милијарди евра во 2011. Откако на почетокот на 2000 година Мекдоналдс беше во Франција синоним за „лоша храна“, од тогаш тој започна да ги служи своите традиционални сендвичи, претставени на француски начин.

Франција беше земјата пилот на прилагодување на брзата храна на ресторанот на локалниот вкус на потрошувачите. Така во текот на годинава се очекува и лансирање на нов сендвич правен со традиционалното француско сирење „камамбер“, откако лани започна со продавање на „француски појадок“ леб-багет со путер и мармелад.

Мекдоналдс лани отвори нови 41 ресторан, а за годинава се предвидени нови 44 ресторани во Франција и реновирање на постоечките.