08.01.2013, 14:10 Рајковиќ две и пол години во Работнички
Најтрофејниот македонски колектив остана без услугите на Немања Јелесијевиќ и Омонди Амоке, нивните замени ќе бидат познати за брзо време.
МАРИЈА КОВАЧЕВА
Емил Рајковиќ и официјално е промовиран како нов стратег на Работнички. Некогашниот младински селектор со челниците на најтрофејниот кошаркарски колектив потпишаа две и пол годишен договор. За Рајковиќ враќањето во Работнички по повеќе од една деценија претставува голема чест и покрај тоа што пред се себе има тешка задача, на својот нов клуб да обезбеди место во Супер лигата.
„Овој нов почеток за мене претставува огромно задоволство бидејќи се враќам дома. По десет год��ни отсуство од „Градски парк“ ова ќе биде добра и интересна авантура за мене, која се надевам дека на Работнички ќе му даде нов почеток и посебен шмек. Се наоѓаме пред нималку лесна задача. Од управата која што е нова, но и максималнп сериозна, добив гаранација дека проектот е долгорочен за да бидеме конкурентни. Титулите не се примарни бидејќи клубот и онака е најтрофеен со 14 титули. Овој момент можеби е малку тежок бидејќи се наоѓа на шестото место на табелата, примарна цел е да се влезе во Супер-лигата, потоа и плејофот, но главните резултати се очекуваат во следните две сезони. Ќе се обидеме да го вратиме победничкиот дух и стариот сјај, но и да се врати публиката на трибините за да го проследи новот раѓање на Работнички. Мислам дека со играчите ќе постигнам да направам екипа што ќе биде гордост на навивачите“, рече на промоцијата Емил Рајковиќ.
За исполнување на амбициите на тимот од „Градски Парк“ поточно освојување на едно од првите пет места по завршување на втората фаза, составот веќе претрпи одредени промени. Американецот Омонди Амоке и Србинот Немања Јелесијевиќ се двајцата кошаркари кои си заминаа од Работнички. По овие заминувања новиот стратег на „црвено-белите“ најави ангажирање на нови квалитетни имиња со што би се потполнина празнината во тимот.
„Немојте да очекувате бомбастични трансфери, пазарот е ограничен, а имаме кус период за ангажирање нови играчи. Најголем дел од играчите имаат договори. Главните трансфери ќе бидат следното лето. Главна цел е да се врати борбеноста, ангажираноста и да се игра убава кошарка“, смета младиот стратег.
Управата на клубот откри дека иако во игра биле неколку странски имиња, сепак одлучиле довербата да ја добие еден од најтрофејниот тренери Рајковиќ.
„Во последните десетина дена Работнички беше во потрага по шеф на стручен штаб. Контактиравме со неколку странски имиња, но во меѓувреме, изминатиот викенд стапивме во контакт со Емил Рајковиќ и се одлучивме за овој стручњак. Иако е млад, тој има богато искуство и е докажан во кошаркарскиот шампионат на Македонија, каде што има освоено доста трофеи. Се има докажано со професионалниот пристап кон работата и верувам дека го направивме вистинскиот избор. Се договоривме за соработка во следните две и пол години, при што ќе му биде овозможено да го состави костурот на тимот и да ја води екипата кон нови успеси“, изјави спортскиот директор Дејан Јовановски.
По првиот дел од сезоната Работнички има четири победи и пет порази и се наоѓа на шестото место на табелата кое не води во Супер лигата каде ќе се приклучи тимот на МЗТ Скопје.
|
