Денвер ја продолжи агонијата на Лејкерси



„Езерџиите“ загубија од Нагетси (112:105) и го запишаа осмиот пораз во „Стејплс центар“

Кој знае кога и дали ќе запре агонијата на Лос Анеџелс Лејкерси. Ѕвездите од „Стејплс центар“ уште еднаш го го предадоа својот дом, овој пат на Денвер Нагетс, со 112:105. Уште еднаш закржлавената одбрана беше поважна од солидниот напад на „езерџиите“, а пресудата повторно ја донесоа нијанси во завршните секунди. Денвер водеше 105:99 кога Брајант постигна тројка со 36 секунди преостанати до крајот. Изгледаше дека ќе има втора шанса за домаќините кога Двајт Хауард го блокираше Андре Милер, но топката се истркала до рацете на Данило Галинари кој не утна од линијата од 7.24 на 13 секунди до кра��от што значеше и сигурна победа за гостите.

„Пред натпреварот им кажав на кошаркарите дека не се сеќавам кога последно сме победиле овде во основниот дел од сезоната. Ова е огромна победа за нас, но нема да се премногу воодушевуваме“, изјави тренерот на Нагетси, Џорџ Карл.

Галинари запре на 20 поени, а еден повеќе од него, плус 10 асистенции запиша Тај Лосон. Коби Брајант беше стандарден со 29 поени, а Хауард конечно заличи на себе, не по 14-те поени, туку со 26 скока со што го израмни својот личен рекорд. Стив Неш придонесе со 10 поени и 13 асистенции за да дојде на само пет помалку од границата од 10.000 успешни додавања.

За Лејкерси (15-18) ова беше трет пораз во низа, а осми само во Лос Анџелес. Тоа изгледа очајно ако се спореди со Оклахома Тандер, лидерот во лигата, кој има само седум порази вкупно, во 33 меча. Последната победа „грмотевиците“ ја извојуваа на гостувањето кај Торонто со 104:92. Решавачка беше серијата од 16:2 во втората четвртина, по што Оклахома си го контролираше натпреварот. Расел Вестбрук постигна 23 поени, Кевин Дурент еден помалку, но најефикасен на натпреварот беше Ален Андерсон со 27 коша.

По поразот од Чикаго во петокот, Мајами се рехабелитира со лесен триумф против Вашингтон од 99:71. Леброн Џејмс броеше до 24 поени, а го поддржа Реј Ален со 20 коша.

Резултати: Торонто - Оклахома 92:104, Мајами - Вашингтон 99:71, Детроит - Шарлот 101:108 (прод.), Феникс - Мемфис 81:92, Лос Анџелес Лејкерс - Денвер 105:112.