07.01.2013, 13:28 Македонско знаме на релито „Дакар“
Бугаринот Христов со овој гест се оддолжи за македонската лиценца со која се натпреварува во класата на квадови
Првпат во историјата на релито „Дакар“, кое се одржува од 1979 година, на стартот беше развеано македонското државно знаме. Тоа го стори Бугаринот Тодор Христов, член на мото-клубот Александар од Скопје, во чест на земјата со чија лиценца се натпреварува во класата на квадови (четирицикли). На церемонијалниот почеток на првата етапа во Лима, Перу, тој ги истакна заврзани македонското и бугарското знаме.
Во своето второ учество на најпрестижното рели во светот по тоа во 2011 година, кога мораше да се откаже во шестата етапа, Христов го освои 37. место во првата етапа и 33. во в��ората. Пред вчерашната трета делница од превидените 14 тој се наоѓаше на 33. позиција во вкупниот поредок меѓу 39 пријавени учесници.
„Навистина уживав во моето прво учество на ’Дакар‘, но тоа беше навистина тешко. Во последниве две години се натпреварував на неколку релија во Катар, во Абу Даби, а завршив и трет кај квадовите на релито ’Мароко 2012‘. Не можам да го дочекам ова второ искуство на ’Дакар‘. Се надевам дека ќе го завршам натпреварот со добар пласман“, изјави софијанецот пред почетокот на „Дакар 2013“, каде што вози „јамаха рептор 700“.
Учесниците на годинашното рели „Дакар“ треба да извозат повеќе од 8.000 километри, од кои половината се специјални брзински испити, а остатокот се поврзувачки етапи. Натпреварот почна во Перу, ќе проидолжи низ Аргентина и ќе заврши на 20 јануари во чилеанскиот главен град Сантјаго. Пријавени се над 450 екипажи, кои се натпреваруваат во четири категории: автомобили, камиони, мотоцикли и квадови. (Р.Д.)
|
