23.07.2012, 15:26 За 700 евра струмичани ќе се приклучуваат на гас
На новиот гасовод во Струмица веќе се приклучени сите општински институции и училиштата, а од идниот месец ќе почне вклучувањето и на домаќинствата и стопанските објекти. Советот на Општина Струмица ја утврди цената за приклучок на домаќинствата, која изнесува 700 евра, а за првите 120 приклучоци ќе има попуст од 150 евра. Како што информираат од „Струмица гас“, гасоводната мрежа е изработена по највисоки светски стандарди и е подготвена да биде приклучена на гасоводот кој ќе го гради Владата.
Јавното претпријатие за енергетски дејности „Струмица гас“ информира дека почна со изградба на декомпресиската станица на излезот од Струмица кон Валандово. Таа е на површина од 5.000 квадратни метри и е витален објект во системот за гасификација на Струмица.
Како што изјави директорот на „Струмица гас” Зоран Китанов, ова е втора фаза во која се гради декомпресиска или регулаторна станица.
„Намената на оваа инсталација е да изврши декомпресија на природниот гас, кој од Петрич ќе се носи во цистерни под притисок од 200 бари и овде ќе се декомпресира на 4 бара“, појасни Китанов.
|
