Изгаснат пожарот во Kривопаланечко

Во локалитетот „Долни Градец“ во кривопаланечкото село Градец, вчера во 10:30 часот избувна голем шумски пожар. Пожарот е целосно изгаснат и ставен под контрола околу 20 часот.

Пожарот, како што информираа од Територијалната противпожарна единица на Крива Паланка зафатил околу 100 хектари површина. Опожарени се 30 хектари дабова шума, еден хектар овошни насади, 69 хектари пасиште и 2,8 тони балирано сено.

Во гаснењето на пожарот учествувале осум пожарникари со две возила, 20 шумски работници од ЈП „Македонски шуми“ - подружница „Осогово“ од Крива Паланка и 15 жители од селото.

Опожарен е државен и приватен имот, а денеска надлежните служби ќе ја утврдуваат причината и висината на настанатата штета.