Уште една рунда дриблање на јавноста

Црвенковски го кани Груевски на ТВ соочување, Груевски вели дека Црвенковски сам себе се дрибла

Наум Котевски

„Господине Груевски, ајде да му ја кажеме вистината на македонскиот народ, ајде веќе еднаш да седнеме на ТВ-дуел и пред целата македонска јавност да ги предочиме фактите и да ги соочиме аргументите. Ајде, охрабрете се и одважете се“, со овие зборови лидерот на опозицискиот СДСМ, Бранко Црвенковски, го предизвика вчера премиерот Никола Груевски. Продолжувајќи со офанзивната тактика и на својот терен на „Бихаќска“, во истиот или можеби сличен костум од каде што го извади документот во веќе култното интервју, но во малку полефтерно издание, без вратоврска, Црвенковски откри дека целиот ден по понеделничкото интервју очекувал да се јави премиерот Груевски.

И, како што вели тој, да и' објасни на македонската јавност зошто предлогот Република Македонија (Скопје), кој бил прифатен од двајцата пред Самитот на НАТО во Букурешт, е подобар од предлогот даден во 2005 година со кој, според него, се зачувувало уставното име на државата.

„На кој начин предлогот од 2008 година го гарантираше националниот идентитет подобро од предлогот во 2005 година, па Груевски со чисто срце и мирна совест да го прифати. За жал, одговор не добивме. И многу е јасно зошто. Затоа што нема и не може да има одговор кој нема да ја разоткрие приказната за лажен патриотизам, за лажна искреност и одговорност на Никола Груевски“, смета Црвенковски.

Премиерот Груевски, кој доби шанса од политичкиот противник да избира телевизија и новинар за предложениот ТВ-дуел, експресно врати на фрлената ракавица на Црвенковски. „Нормално беше и се очекуваше човекот кој толку многу секојдневно се занимава со шпекулации и извртување на вистината, во еден момент да се издрибла самиот себе. Ме вика на ТВ-дуел и сака така да се извади. Граѓаните вчера видоа, излегоа податоците и документите кои самиот тој ги извади и се виде дека тој предлог има сериозни проблеми во делот на јазикот, националноста, кои се крајно проблематични и нејасни“, рече Груевски, кој додава: „И ден денеска ме чуди зошто тој прифати такво нешто од прва, особено што Грција го имаше одбиено предлогот“.

Според него, практично во предлогот нема ни „г“ од гаранции за идентитетот, но и во делот на јазикот и на националноста.

Груевски вели дека не е добро што Црвенковски ја користел оваа тема за дневнополитички поени, затоа што прашањето за името, за идентитетот, националноста и јазикот е стратешко прашање за Македонија.

„Ако тој во основа е одговорен политичар не би требало на какви било настапи во јавноста да вади државни документи одбележани со државна тајна и да зборува за детали, а со тоа на некој начин да ја нарушува дополнително позицијата на Македонија“, рече Груевски, додавајќи дека „тоа е прашање за кое треба политичарите да разговараат, да бараат нешто што е најдобро за државата и за народот, а не да се препукуваат преку медиумите и да собираат дневнополитички поени“.

Веројатно сметајќи дека во случајот „недозволено објавување на документи со печат строго доверливо“ нема случај, одбраната од таквите напади Црвенковски ја остави за крај.

„Преку вашите медиумски мегафони ми упативте закани за некаква кривична одговорност за оддавање државна тајна. За некакви затворски казни. Веднаш да ви одговорам. Ич око не ми трепнува. Само напред. Ниту ќе ме уплашите, ниту ќе ме замолчите. Само дополнително ме мотивирате“, му се обрати Црвенковски директно на премиерот.

Во тој контекст тој потенцираше дека Груевски прв јавно почнал да ја обелоденува содржината на документот означен како државна тајна.

„Со огромно задоволство би ја споделил кривичната одговорност со вас. Тоа што дополнително го доставивте документот на државната агенција МИА нема да ви го третирам како отежнителна околност. Барем не јас. За обвинителството не знам“, додаде лидерот на социјалдемократите, притоа дополнувајќи дека „документот што го оставив за време на интервјуто е оригиналниот текст на англиски, а се' друго што потоа се појави, демек случајно, се текстови од МНР со разни печатни грешки“.

Груевски за строго доверливиот момент во целата преписка уште еднаш најави дека државните институции ќе го разгледуваат гестот на Црвенковски. „Тој свесно оди на злоупотреба на документи за некоја дневнополитичка цел и ситни поени не гледајќи дека со тоа прави штета на интересите на државата затоа што сега во Грција има избори. Тие ќе завршат, ќе се формира влада и треба да се продолжат разговорите со нив. Сето ова што тој денеска го говори ќе биде дел од оружјето на другата страна, условно кажано дипломатско оружје кога ќе седнеме да разговараме“, рече Груевски.

ВМРО-ДПМНЕ: Дуелот се случи на изборите

Повикот на лидерот на СДСМ Бранко Црвенковски за ТВ-дуел со претседателот на ВМРО-ДПМНЕ Никола Груевски е со цел да се оцрни Груевски со калта во која се наоѓа Црвенковски, оцени ВМРО-ДПМНЕ.

„Најголемиот дуел меѓу нив двајца се случи пред неполни 10 месеци на последните парламентарни избори. Дуел кој Црвенковски го изгуби и затоа е во опозиција. Следниот дуел доаѓа на наредните избори каде што граѓаните повторно ќе гласаат и ние тој дуел со задоволство го чекаме“, изјави директорот на Центарот за комуникации на ВМРО-ДПМНЕ, Илија Димовски.

Зошто толку се зборува за минатото?

„Апсолутно се согласувам со изнесените констатации дека не треба да зборуваме за минатото, туку за иднината. Но Груевски, наместо да зборуваме што натаму по Самитот во Чикаго, не' врати во 2005 година. Прв го злоупотреби предлогот од 2005 година. Цитирајќи делови од него, сакаше да ме направи предавник. Е, тоа така не може. Затоа што не е вистина“, вели Црвенковски.