Пропадна тендерот за Луна-парк

Иако три фирми подигнале тендерска документација, сепак, ниту една не доставила понуда

Пропадна тендерот за избор на концесионер на Луна-паркот. Долгонајавуваниот проект за изградба, управување и одржување на забавниот парк остана без инвеститор и покрај тоа што рокот за избор на најповолен понудувач беше пролонгиран неколку пати, а градските власти тврдеа дека продолжувањето е по барање на компаниите за да ги докомплетираат документите.

Од Градот велат дека три фирми подигнале тендерска документација, но до вчера, кога официјално заврши тендерот и требаше да бидат отворени понудите, немало доставено ниту една. Со ова, паднаа во вода најавите дека по изборот на најповолниот инвеститор веќе во август ќе се потпише договорот. Надлежните се надеваа дека со оглед тоа што периодот за изработка на најсложените апарати е шест месеци, кон крајот на годинава требаше да започне и нивното монтирање.

Инаку, уште претходно студијата за овој проект покажа дека Луна-паркот се движи на граница на профитабилност, имајќи предвид дека инвестицијата е прилично скапа, а забавните содржини ќе можат да се искусат само неколку месеци во годината. Според студијата што ја изработи шпанската фирма ИДОМ, изградбата на Луна-паркот треба да чини околу 10 милиони евра. За неговата изведба најпрво беа предвидени 25 илјади квадратни метри, но со проширувањето кон езерцето во паркот површината се зголеми на околу 40 илјади квадрати метри. (Б.Ш.)