Тачи застана на страната на ДУИ

Многу шпекулации и прогнози, но клучот за решавање на политичката криза останува кај Груевски и Ахмети

Лидерот на ДПА, Мендух Тачи, отвори простор за договор со ДУИ околу идна техничка влада, изјавувајќи дека ако се сериозни во намерите и изјавите, тогаш ќе има поголем простор да се разговара и за тоа.

Во изјавата што ја даде по средбата со Филип Рикер, Тачи не остави сомнеж дека во кавгата со ВМРО-ДПМНЕ околу законот за бранителите ќе ја поддржи ДУИ без резерва. Запрашан пред се' дали политичката криза е сериозна, Тачи одговори:

„Не знам. Многу шеми си имаат двете страни овие изминати четири години. Ова станува сериозно. Ние ќе ги п��ддржиме напорите на ДУИ да попречи донесување на ваков лош антиалбански закон. Ако тие мислат дека тоа може да се оневозможи преку предвремени парламентарни избори, ние сме подготвени да разговараме со нив за тоа“, изјави Тачи.

На забелешката дали би се согласил дека е подобро да се направи прво техничка влада, тој одговори:

„Не знам, ќе видиме. Ако се сериозни намерата и изјавите на ДУИ, тогаш ќе има поголем простор да се разговара и за технички аспекти“.

Од ДУИ, пак, најавија дека размислуваат за сите можности, а што ќе решат зависи од случувањата околу Законот за посебните права на бранителите.

„Доколку нашиот предлог не биде прифатен, а Законот за посебни права на бранителите биде изгласан, тогаш ние ќе ги разгледаме сите опции кои ни стојат на располагање“, изјави Бујар Османи, портпарол на ДУИ. (С.Ј.)