22.08.2012, 16:34 Почина Томислав Стојановски - Далавера
Поранешниот претседател на парламентот беше горд што и' припаѓа на политичката десница и на опција која носи предназнак ВМРО
„Моите политички или идеолошки неистомисленици не ги доживувам како непријатели, туку исклучиво како политички противници. Со многумина од нив сум близок пријател, но кога треба да се брани одредена политика, тогаш јас ќе застанам зад онаа политика за која се залага мојата политичка опција.“ Вака Томислав Стојановски, поранешниот потпретседател на парламентот, кого се препознаваше по прекарот Далавера, го објаснуваше своето политичко делување, кое датира уште пред осамостојувањет�� на Македонија.
Стојановски почина денеска, по кратко боледување, на 79 години.
Тој беше горд што и' припаѓа на политичката десница и на опција која носи предназнак ВМРО. Не ретко ќе кажеше дека ВМРО е во него и во неговото семејство многу одамна. Тој знаеше да каже дека не е од оние кои ја основале ВМРО-ДПМНЕ, но дека е еден од оние кои први ќе и' се приклучат на оваа политичка партија, од која, сепак, се раздели по смената на Љубчо Георгиевски. Тој е еден од оние кои безреревно го следеа Георгиевски кога замина во ВМРО-Народна партија. Но, и покрај тоа, Стојановски велеше дека нему и натаму му е битно работите и во ВМРО - ДПМНЕ да се одвиваат онака како што првично биле замислени.
„После се' што се случи, ретко некој ќе си спомене за што се' сум се залагал. Се заборава моето залагање за интонирање на македонската химна, за македонското знаме и грб. Сега, најчесто ме доживуваат како татко на Драган Даравелски. Јас не разбирам што сакаат од мене? Да се откажам од единствениот син? Тоа е лудост! Кој би се откажал од своето дете? Сепак, она што ми претставува некаква утеха е тоа што луѓето почнаа да го разбираат и тој немил случај со Драган . Луѓето самите почнаа да ми приоѓаат. Ми даваат поддршка да истрајам во мојата лична борба“, велеше Стојановски, кој беше и адвокат во случајот кога му се судеше на неговиот син.
Покрај политиката, правото и адвокатурата му беа најголема љубов. Тој имаше неверојатна упорност. Знаеше да прецизира законски одредби и без да го има законот пред себе, а кога некој ќе го прашаше како тоа му успева ќе каже дека тоа е резултат на 50 - годишното работење како адвокат.
Томислав Стојановски е роден на 15 мај 1933 година во Куманово. Дипломирал на Правниот факултет завршил во Скопје, а од 1956 година работи како судија во Општинскиот суд во Куманово, а едно време ја извршувал и функцијата претседател на судот во Кратово. Во 1962 година отвора своја адвокатска канцеларија, која опстојува половина век. Пред распадот на СФРЈ, Стојановски бил делегат во тогшаниот Собор на републиките и покраините, а во периодот 1990 - 1994 беше пратеник во Собранието. Во вториот пратенички мандат, во периодот 1998 -2002, Стојановски беше потпретседател на Собранието, а малку беше избран за член на Републичкиот судски совет. (Љ.С.)
|
