Доколку се загрозат институциите, ВМРО - ДПМНЕ е подготвена за избори

Премиерот Груевски наведе дека ситуацијата е се` уште исклучително сложена и ќе зависи од многу работи што ќе се случуваат во иднина

Ситуацијата е се` уште исклучително сложена и ќе зависи од многу работи што ќе се случуваат во иднина. ВМРО - ДПМНЕ останува на ставот дека треба да се донесе Законот за бранители и ќе ги направиме сите можни чекори и што е во наша моќ тој да биде донесен. Од таа гледна точка ВМРО - ДПМНЕ ќе го продолжи она што го започна.

Ова е одговорот од премиерот Никола Груевски на новинарско прашање како ��леда на настаните што се случуваат во Собранието на Република Македонија, со постојаното влегување и излегување од седниците на одредени пратенички групи и дали постои политичка криза.

- Како ќе се однесуваат другите политички партии останува да видиме. Ние кажавме дека не посакуваме предвремени парламентарни избори, но доколку бидеме доведени во таква ситуација, не се плашиме и сме подготвени да влетаме во такви предвремени парламентарни избори и да ја добиеме довербата на граѓаните затоа што работиме одговорно чесно и посветено, а тоа што го ветуваме - го исполнуваме, потенцира премиерот Груевски одговарајќи на новинарско прашање каков е ставот на ВМРО - ДПМНЕ во врска со предвремени парламентарни избори.

Тој истакна дека е најважно да продолжи функционирањето на институциите. Долку се соочиме со нивно не функционирање или со непринципиелности од одредени страни, подвлече Груевски, во тој случај, информира, може да реагираме со барање за предвремени парламентарни избори.

- Доколку некој друг сака да функционира со непринципиелни работи, а деновиве слушам дека се зборува за бранкова, за привремена влада, за техничка, за фрчкова влада... и ако тие луѓе сакаат да ја водат непринципиелно земјата, тогаш нека повелат и нека го прават тоа. Ние ќе работиме принципиелно и онака како што е најдобро за интересите на граѓаните на Република Македонија и за оваа држава, изјави денеска  претседателот на Владата на Република Македонија на отпочнувањето на градежните работи за изгрдба на канализација во село Стајковци.

Во врска со истекувањето на рокот утре, во кој, требаше да бидат тргнати таблите од училиштата каде што беа изменети имињата во скопската општина Чаир, премиерот Груевски укажа дека за тоа прашање има одредени законски процедури, чиј процес е започнат, а нивното спроведување ќе продолжи онака како што налагаат законските прописи.