Семејството на премиерот пред очите на јавноста

Никола Груевски се обидува да го покаже и човечкиот лик на политичарот и гласно да каже дека не е се' во кариерата, велат експерти

Наум Котевски


Во екот на кампањата против опаѓање на наталитетот и во време на груба девалвација на човечките вредности, премиерот Никола Груевски се почесто се' појавува во јавноста заедно со неговото семејство. По посетата на циркусот, скопската Зоолошка градина, Етно-селото и мегалитската опсерваторија Кокино, деновиве тој со сопругата Боркица и ќерките Анастасија и Софија беше на прошетка на Водно и се возеше на скопската жичарницата.

Груевски, кој на средбата со бизнисмените во „Александар Палас“ рече дека опаѓањето на наталитетот многу повеќе боли од економската рецесија, не пропушта да ја прикаже својата семејна идила од камерите и фотоапаратите. Многубројните фотогалерии објавени на интернет порталите и во весниците на кои се гледа како тој ги лула своите ќеркички на лулашки и како во ерата на високата компјутерска технологија ги учи да летаат змејови, не се некаков папарацо подвиг, туку се дел од смислената промена во ПР- тактиката на премиерот, како обид за воспоставување поцврст и поискрен однос со јавноста.

Наспроти еродирањето на етиката на јавниот збор и реториката на поделби и создавање непријатели на политичката сцена, македонскиот премиер, веројатно, се обидува да го покаже и човечкиот лик на политичарот и гласно да каже дека не е се' во кариерата. Неговиот тим мудро проценил дека луѓето се' повеќе се интересираат за личноста на оние што ги водат и оттаму паметно ги користи сите алатки за подобра промоција пред граѓаните. Подобро упатените во оваа област ја поздравуваат идејата на Груевски за малку поинаков комуникациски чекор, но напоменуваат дека сето тоа ќе остане во доменот на политиканството и пропагандата, односно на обид за освојување некој политички поен повеќе, доколку во борбата за зголемување на семејните вредности и на наталитетот не се вклучат сите општествени фактори. Во таков случај, според нив, главната цел е промашена.

„Јасно е како реагира јавноста на семејните слики на премиерот. Тука нема дилеми. Повеќето си велат дека ако тој е семеен човек и се грижи за најблиските ќе се грижи и за државата. Нормално е за јавните личности да сакаат да го прикажат она што не било дел од јавноста. Мене лично не ме изненадува тој изблик, таа желба на премиерот да го покаже семејството, да покаже пред граѓаните дека е семеен човек. Впрочем, тој е лидер на една демохристијанска партија“, вели Гоце Пачемски од агенцијата Имиџ ПР, кој е загрижен што во борбата за враќање на вредностите е исклучена научната мисла.

Според него таа и граѓанскиот сектор не смеат да бидат оставени на периферијата. „Со илјада книги преведени на македонски не се помага науката. Доколку не видиме суштинска промена на тоа поле, попусти ќе бидат обидите на премиерот, се разбира ако се искрени“, додава Пачемски.

До неодамна Груевски според начинот на политичко дејствување беше споредуван со премиерот на Русија, Владимир Путин. Особено во желбата да демонстрира издржливост, работливост, одлучност, политичка сила и цврста рака. Но, за разлика од Путин, кој е секогаш подготвен за авантура во сибирската дивина, за нуркање во водените длабочини, за пилотирање борбени авиони, како и за јавање коњи гол до појас..., Груевски досега пред камери покажа дека сака да игра фудбал и да вози велосипед по патеката на скопскиот кеј, слушајќи како што самиот велеше техно музика.

Сепак, последните семејни фотографии за момент го „спасуваат“ премиерот од паралелите со Путин и го носат многу поблиску до споредби со начинот на кој функционираат американските претседатели.

„Американските претседатели, особено во изборна година, интензивно го покажуваат своето семејство. Семејната тема е една од водечките во американското општество. Кај Путин работата е сосема друга. Кај него не може да се забележи семејната активност. Тој секогаш ја велича сопствената сила и цврста рака. Тоа е многу важно во политичкиот амбиент во Русија“, оценува Пачемски.

Татјана Лопарски од „Елемент ПР“ потсетува дека „една фотографија вреди милион зборови“ и дека е таква и последната фотографија на премиерот со неговата сопруга и ќерките. Според неа, тоа моќна фотографија која што покажува многу – почитување на семејни вредности, искрен однос, смиреност.

„Таа фотографија зборува многу за оној што ја гледа, бидејќи го чувствува премиерот близок до себе, до обичниот народ – слика на татко во вистинска смисла на зборот. Семејството е основа на се', врз кое што се базираат вредностите во едно општество. Ова е одличен потег од многу аспекти. Првпат на ваков начин е прикажан животот на еден политичар во Македонија“, вели Лопарски.

На прашањето дали е важен карактерот на политичарот за спроведување ваква ПР стратегија и може ли секој успешно да ја реализира, Лопарски одговара дека се' зависи од тоа колку тој сака приватниот живот да го спои со својата јавна функција.

„Се' е до желбата. Досега имало обиди. На пример, Владо Бучковски исто така беше секогаш достапен за јавноста со детали од својот приватен живот. Но, што се однесува до комуникациската стратегија на Никола Груевски, барем досега, се' е направено беспрекорно одлично. Смислено, реализирано и ефектуирано како што треба. Кој и да му е советник одлично си ја врши својата работа. Сите ние сакаме да видиме како живее премиерот, кои се неговите навики, како се однесува со своите најблиски. Љубопитноста е дел од сите нас. Психологијата вели дека колку повеќе дознавате за политичарот, толку тој ви станува поблизок. А ’близината’, комбинирана со политичка стратегија која се води континуирано, значи многу на денот на избори“, вели Лопарски.