„Ќе откриеме кој им помагал на криминалците“

Директорот на Бирото за јавна безбедност, Љупчо Тодоровски, во Кочани ја координира акцијата

Даниела Трпчевска



Кочани веќе цела недела не спие мирно. Првиот човек на Бирото за јавна безбедност при МВР, Љупчо Тодоровски, со тим инспектори од Скопје сите активности ги пресели во градот на оризот. На лице место ја координираат акцијата и ги планираат следните претреси на објекти и локали поврзани со акцијата „Детонатор“. Се проверуваат документи, сознанија, се разговара со сите оние што биле поврзани со групата која беше приведена за криминалот со рекет, изнуди, нелегално коцкање и насилство во источниот дел на земјава. Но, главните разговори кои се водат меѓу високите функционери на МВР во Кочани се околу тоа кој се' и' помагал на групата и каква е одговорноста на вработени во полицијата и државните органи за прикривање на криминалот во кочанско-виничкиот крај.

„Вршиме интензивни разговори и проверки околу инволвираноста на наши вработени во криминалните активности. Се обидуваме да ја откриеме нивната поврзаност со приведените, но во фокусот на истрагата не се само вработени во полицијата. Се вршат проверки и на вработени во државните органи и во УЈП, за кои има сомневање дека биле инволвирани во сето ова. Кога ќе обезбедиме докази, ќе ги преземеме следните чекори за расчистување на случајот“, вели за „Утрински весник“ првиот човек на БЈБ.

Иако во јавноста се појавија информации дека во изминатото деноноќие имало нови приведувања во Кочани, на поранешни полициски функционери, Тодоровски го демантира тоа.

„Засега нема нови приведувања. Во тек се претреси во неколку објекти во градот, каде што е најдена огромна количина на нелегални покер-апарати, уште повеќе отколку што беа откриени пред неколку дена“, објаснува директорот на Бирото за јавна безбедност.

Покрај интензивните претреси кои се вршат веќе со денови во Кочани и околината, тој вели дека акцијата ќе се шири и во другите градови.

„Ќе се вршат претреси и проверки секаде каде што ќе имаме сознанија дека се ширел криминалот“, додава тој.

Акцијата „Детонатор“ беше обелоденета викендов, кога за време на првоаприлскиот маскенбал полицијата приведе 23 лица од Кочани и од Виница. Повеќето од нив завршија во притвор, а неколкумина се во бегство. Според полицијата, една година сееле страв во источниот дел на земјава – се служеле со уцени, рекет, насилство и кражби...

Како организатори на групата се посочени шестмина од Кочани и до Виница, од кои двајца се повратници од странство, кои искуствата стекнати надвор ги примениле на македонско тло и помогнале групата да се зајакне минатата година. За петмина од приведените, според крим-евиденцијата на МВР се води обемно полициско досие. Изминативе десетина години за нив биле поднесувани пријави, а се изрекувани и затворски казни за насилство. „Изрекувани им се затворски казни од по осум месеци за насилство, но немаме сознанијата дали пресудите се правосилни“, вели помошник- министерот за информирање во МВР, Иво Котевски. Само еден од организаторите на групата нема полициско досие за претходни кривични дела.


Покер-апарати запленети и во Кочани

Над 200 апарати за игри на среќа се запленети при вчерашните претреси на локали и магацини во Кочани. За нив сопствениците не поседувале ниту документација, ниту пак лиценца за работа. До вчера попладне биле извршени претреси во три локали и магацини во градот, каде што биле пронајдени коцкарските машини. Нови приведени нема, но истрагата на полицијата продолжува. „Акцијата зема се' поголем замав. Штом ќе се влезе во еден објект, се шири истрагата и на неколкумина други за кои постојат сомневања дека се поврзани со сопствениците кои организирале илегално коцкање“, велат во МВР. Само во изминативе неколку дена, полицијата заплени над 400 покер-машини и рулет-маси во Кочани и во Крива Паланка. Сопствениците на објектите каде што беа запленети апаратите беа приведени при акцијата „Детонатор“. (Д.Т.)