Зоран Трајчевски на кормилото на СРД?

Светлана Унковска

Претседателот на Советот за радиодифузија, Зоран Стефановски, ги брои последните денови на позицијата прв човек во ова регулаторно тело. Deneska тој, откако го искористи ланскиот годишен одмор, повторно ја водеше седницата, а засега има закажано уште една за овој вторник. Мандатот на Стефановски завршува по велигденските празници, а за негов наследник, иако се' уште е во фаза на шпекулации, се подготвува Зоран Трајчевски кој е сега член на Советот за радиодифузија.

Тој не негираше дека ќе биде наследникот на Стефановски, но практично потврди одговарајќи на прашањето дали нема да му пречи да ја преземе претседателската функција на СРД како независно регулаторно тело, со оглед на фактот што тој беше кадар на ВМРО-ДПМНЕ.

„Јас веќе четири години не сум во партијата, но Советот за радиодифузија нема заедничко со политиката, бидејќи тоа е регулаторно тело на трговски радиодифузни друштва, така што не гледам дека има некаков проблем“, ни изјави Трајчевски.

Претседателската функција на Советот за радиодифузија е чувствителна позиција, бидејќи Советот ја регулира работата на електронските медиуми. Пред да биде член на Советот за радиодифузија, Трајчевски беше претседател на Агенцијата за електронски комуникации поставен од ВМРО-ДПМНЕ, а меѓу другото и владин претставник во „Телеком“, поранешен директор на охридски ЕМО, како и претседател на Советот на општина Аеродром во времето кога градоначалник беше Кирил Тодоровски.

Советот за радиодифузија е на удар на многу критики откако беше одлучено да се прошири составот на членовите од девет на дури 15 члена, што се протолкува како обид на владејачката ВМРО-ДПМНЕ за добивање мнозинство во Советот, а со тоа и контрола при донесување на одлуките. За ова тогаш реагираше ОБСЕ, а како забелешка беше наведено и во последниот извештај на Европската комисија, а со заедничка изјава се јавија и Здружението на новинари на Македонија и Македонскиот институт за медиуми кои што критикуваа затоа што постапката за ваквата измена беше донесена со нетранспарентна постапка.

За изборот на новиот претседател е потребно мнозинство гласови од вкупниот број членови на Советот, што значи од вкупно 15, за избор се потребни најмалку осум гласови. Заедно со актуелниот претседател Стефановски, мандатот им истекува на уште двајца членови на Советот, Али Алиу и Томе Груевски, но изборот на Трајчевски нема да биде проблематичен со оглед на распоредот на силите меѓу членовите на СРД.

Згаснаа телевизиите Џангл ТВ и Скај нет плус


Советот за радиодифузија deneska им ги одзеде дозволите за емитување програма преку сателит на телевизиите Џангл ТВ и „Перспектива“, (Скај нет плус“). За одлуката да и биде одземена дозволата на Џангл ТВ од присутните 12 членови, „за“ гласаа 11 и еден беше воздржан, додека за престанување на работењето на Скај Нет Плус гласаа 10 членови.

Причина за одземањето на концесиите е неплатен надоместок кон СРД, за што телевизиите претходно неколку пати добија опомени. Спорни се и телевизиите 24 вести, АБ канал, Наша ТВ и Пинк 15 плус, бидејќи и тие ги немаат платено концесиите, но ним нема да им биде одземена дозволата за работа, бидејќи деновиве склучиле договор со Советот за плаќање на долговите на рати. На „АБ Канал“ Советот и' даде рок од 15 дена да ги реши техничките проблеми за да може повторно да ја емитува својата програма преку сателит, откако пред неколку дена беше прекината. (Св.У.)