Кафуле во дворот на гимназијата „Јосип Броз Тито“

Градот дал дозвола за работа, станувало збор за бифе. Ова не е прв случај, така со години функционира кафеаната во „Георги Димитров“

Деспина Трајковска


Дека моралот и етиката во образовниот систем ги загубија границите докажува кафулето отворено во дворот на една од најпрестижните скопски гимназии. Веќе трета недела во рамки на „Јосип Броз-Тито“ функционира објект како дел од спортската сала, во кој се служи секаков вид пијалак, дури и алкохолен, но и храна.

Вчера претпладне летната тераса на кафулето беше преполна со ученици. Најголемиот дел од нив пиеја кафе, ретко кој јадеше.

Станарите од околните згради, но и некои од родителите на учениците во гимназијата се прашуваат како е дозволено во рамки на образовна институција да работи кафуле. Според нив, станува збор за две неспоиви намени. Сметаат дека тоа ќе биде катче создадено за собиралиште кога учениците бегаат од часови. Згора на се', стравуваат дека во кафулето децата ќе можат без никаков проблем да пијат алкохол, оти тој е на листата на пијалаци во објектот кој е со работно време, вообичаено за „обичните“ кафулиња.

„Нема ништо невообичаено. Станува збор за бифе кое закупецот го доби по регуларна постапка. Не е точно дека се точи алкохол, ниту, пак, дека тоа ќе биде дозволено за време на часовите, односно до 19,30 часот до кога има настава. Што ќе се случува потоа е одлука на сопственикот“, тврди Соња Мироноска, директорка на „Јосип Броз-Тито“.

Според неа, првенствено станува збор за училишно бифе во кое дури и професорите пијат кафе и јадат. Гимназијата, како и повеќето во градов, го издала просторот на користење на заинтересиран закупец кој за возврат, освен што плаќа кирија за просторот, реновирал голем дел од училишните објекти. Речиси целосно ја реновирал салата, тоалетите, соблекувалните, некои помошни простории, па дури ќе изградел и нови три игралишта на местото на дотраеното, кое учениците го користеле на часовите за физичко образование.

„Сами во ниту еден случај немаше да можеме да ги обновиме потребните простории, салата, тоалетите и слично. За жал, со финансиите едвај излегуваме на крај, па затоа се одлучивме на издавање на просторот, што е случај со голем број училишта во државава“, дополнува Мироноска и објаснува дека целата постапка ја спровела со дозвола на Град Скопје, кој е основач на училиштето.

И од Градот потврдуваат дека станува збор за легална и вообичаена постапка практикувана веќе неколку години. „Во случајов нема ништо спорно, ниту, пак е некоја новина за училиштата. Гимназијата има добиено одобрение од Градот за издавање на просторот. Всушност, ова не е прв ваков случај. Веќе неколку години слично функционира и гимназијата ’Георги Димитров‘ “, велат градските власти, според кои ова е пример за добро менаџирање на училиштето, имајќи предвид дека самостојно успеало да ги подобри условите за работа.

Закупецот на кафулето, кое, всушност, е реновиран дел од спортската сала, не гледа драма во случајов. Напротив, се' било во интерес на учениците и на гимназијата. Тоа што во објектот се служи алкохол, за него не е причина за сомнеж за разврат на децата, оти како што вели, до 19,30 часот до кога има настава, точењето алкохол е строго забрането.

„До 19,30 работи како бифе, а потоа како обично кафуле. Точење алкохол е дозволено дури по 19,30 часот, така е договорено со училиштето. Сигурно не сум малоумен да дозволам учениците да се служат со алкохолни пијалаци, бидејќи не само што ќе го доведам во прашање договорот што го имам за закуп, туку и казните од инспекциите се ригорозни, а во објектот имам вложено илјадници евра“, вели сопственикот на кафулето, кој сакаше да остане анонимен и тврди дека за работа навечер како обично кафуле ги поседува сите соодветни дозволи.

Инаку, не само што со реновирање на објектот учениците од „Јосип Броз- Тито“ добија современо бифе, туку наскоро ќе можат да спортуваат и на нови игралишта. Деновиве, закупецот гради три терени, за фудбал, за кошарка и за одбојка на песок, кои за време на наставата ќе бидат на услуга на учениците, а по 19,30 часот ќе функционираат како спортски комплекс за чие користење ќе се наплаќа.

Од Министерството за образование не се изненадени што во двор на училиште е отворен угостителски објект. Велат тоа не е прв случај и коментираат дека Министерството нема никакви овластувања за евентуални кршења на закони и прописи со кои се регулира издавањето на училишните простории.

„Можеме да реагираме единствено доколку станува збор за државно училиште. Во случајов надлежни се од Град Скопје, кои се основачи на најголем дел од средните училишта во Скопје“, ни рекоа вчера од ресорното министерство.