Професори тепале ученици во Хемиското училиште

Учениците малтретирале ученичка, по што биле нападнати и удирани од професорите. Според полицијата, се работи за три инциденти во серија

Љубиша Станковиќ

По повеќе од една година, повторно се случи инцидент во Државното средно училиште „Марија Кири-Склодовска“. За разлика од тогашната масовна тепачка, сега се случи серија од три инциденти во кои се инволвирани и ученици и наставници. Двајца ученици од средното хемиско училиште биле натепани од професори, откако 15-годишна ученичка се пожалила дека била нападната од нејзини соученици. Професорот по хемија, кај кого се пожалила, веднаш тргнал да ја расчистува ситуацијата. Нападнал 15-годишен ученик, по што бил спречен од страна на обезбедувањето во училиштето.

Малку потоа следел и нов инцидент. Професорот по англиски нападнал 16-годишен ученик, кој го турнал по скалите. Против двајцата професори ќе бидат поднесени пријави.

Се' почнало завчера околу 15 часот, кога двајца ученици од втора година задевале своја соученичка од прва година. Пред влезната врата на училиштето 15-годишното девојче од Арачиново, било пресретнато од ученик кој најпрво ја удрил по рамо, а потоа и' удрил и шлаканица.

Таа за нападот го информирала професорот по хемија Б.Х.(24), а тој, пак, повикал екипа на медицинска помош, по што била пренесена во болница. Таму и' биле констатирани лесни телесни повреди.

Упатувањето на девојчето во болница не значело и крај на случувањата во средното училиште. Малку по настанот, во училишниот ходник професорот по хемија физички нападнал 15-годишен ученик. Тој го влечел ученикот за уво, а потоа со тупаница го удрил по рамо и му нанел видлива повреда. За среќа, навреме бил спречен од обезбедувањето на училиштето.

Во исто време, во училишниот ходник, и професорот по англиски јазик Н.Б. (28) физички напад еден од учениците. Тој без повод и причина, почнал да го влече ученикот за рака, а потоа го турнал по скалите, но натамошното малтретирање било спречено од помошникот директор.

„Во ходникот немало толпа од деца како што сега се раскажува. Професорите, со кои и јас разговарав, ги повлекле децата за рака со намера да ги однесат кај училишниот психолог. Сметам дека и тоа што го направиле не смееле да го направат, но дали и какви постапки во иднина ќе бидат преземени зависи од она што ќе го каже полицијата. Најмалку од се' сакам на овој случај да му дадам друга димензија, односно како инцидент кој во заднина има меѓуетнички карактер. Лично јас самиот на сите класови им го прочитав соопштението за однесување на учениците и со што им се заканува и отстранување од училиштето“, вели Павле Павлов, директор на Државното средно училиште „Марија Кири-Склодовска“.

За двајцата професори ќе следат прекршочни пријави за физички напад. Како што неофицијално се дознава, еден од пријавените наставници и претходно бил во судир со законот. За професорот по хемија, уште во ноември 2005 година била поднесена кривична пријава за спречување службено лице при вршење службена должност. Само две години подоцна за овој наставник била изречена и пресуда, односно тој бил осуден на затворска казна во траење од една година, која му е заменета за условна казна во траење од три години.

Во јануари минатата година, во хемиското училиште се случи голем инцидент, кога голема група маскирани насилници со метални прачки дивееја низ училиштето. Во налетот на насилниците со повреди се здобија четворица ученици и еден професор, а мотив за тепачката беше љубомора.