Иванов: Во Чикаго да се преиспита заклучокот од Букурешт за Македонија

Обраќање на претседателот на отворањето на Конференцијата на министри за одбрана на САД и Јадранската група

Предизвиците се се побројни и поразновидни. Глобалната економска криза и нејзините импликации врз регионалната безбедност и развој, енергетската безбедност, но и можностите за примена на НАТО-концептот „Паметна одбрана“. Какви и да се предизвиците, верувам дека здружените решенија не вклучуваат само споделени вредности, задачи и одговорности. Тие вклучуваат и споделени права и привилегии кои произлегуваат од посакуваното и пред се заслужено членство во НАТО.

Ова го нагласи претседателот на Република Македонија Ѓорге Иванов на отворањето на Конференцијата на министри за одбрана на САД и Јадранската група што денеска се одржува во Скопје.

Конференцијата е вистинското место во периодот пред претстојниот Самит на НАТО во Чикаго, подвлече Иванов, да се сетиме од што меѓу другото произлезе Јадранската повелба. Во преамбулата на Повелбата стои дека парт��ерството произлегува од можноста за заокружување на „целосна нова Европа“ во која секоја нација, секоја етничка група, секој граѓанин и секоја вера се безбедни, сигурни и почитувани. Сакаме да бидеме партнери и сојузници со сите наши соседи, истакна шефот на државата, и заедно да ја градиме сегашноста и иднината на нашиот регион.

- За жал, како што и многупати досега е констатирано, формално иако не и суштински, нашата желба е попречена и тоа поради еден апсурден и наметнат спор. Спор во кој се соочуваме со соодветна уцена и ултиматум, рече претседателот Иванов пред присутните министри за одбрана, дипломатскиот кор и сите други учесници на конференцијата.

Ние сме незадоволни, но не сме обесхрабрени, порача Иванов, укажувајќи дека незадоволството не значи напуштање на партнерството и визијата.

- Напротив, уште сме поохрабрени и силно сме фокусирани на она што е наш дел од обврската. Исправноста на нашето досегашно одговорно однесување беше само потврдена со пресудата на Меѓународниот суд на правдата. Пресуда што нуди нова правна димензија и бара нов пристап од сите земји-членки на НАТО, подвлече во обраќањето Иванов, додавајќи дека тој пристап подразбира и тоа дека земјите-членки на НАТО треба да ги преиспитаат нивните позиции во однос на членството на Македонија во Алијансата.

Според македонскиот претседател, почитувањето на пресудата на меѓународното право и конечно, како што рече, и на Времената спогодба, налага во Чикаго да биде преиспитан заклучокот од Букурешт.

- Затоа се надеваме дека нашиот сосед во духот на вредностите кои го споделува со членките на Алијансата ќе ги почитува договорите, односно обврските од Времената спогодба, порача претседателот Иванов, посочувајќи оти почитувањето на договорите и на меѓународното право се гаранција за побезбеден и понапреден свет.