Магични печурки на македонско мени

Кутиите со халуциногената дрога се откриени на царина откако скопјанец дошол да ја подигне пратката од Белгија

Горан Адамовски



Скопјанец е приведен откако преку пошта од Белгија му стигнале познатите магични печурки, кои важат за халуциногена дрога. Скопјанецот и неговата девојка пред извесен период биле на туристичка тура во Холандија и во Белгија. Таму се запознале со луѓе кои им ветиле дека редовно преку авион ќе им испраќаат од печурките, како и семки од марихуана. Пред неколку дена пратката стигнала во Скопје. Цариниците се посомневале што има во неа. Забележале една проѕирна кесичка со семки од канабис, како и две кутии со магичните печурки. Завчера попладне, скопјанецот дошол да ја подигне пратката, по што бил приведен од полицијата.

Халуциногените печурки со години назад се присутни во земјава, а невладини организации укажуваа дека се' поприсутни се во училиштата и меѓу средношколците. Станува збор за вид на печурки кои содржат псилобицин, широко распространета и евтина дрога. Во зависност од методот на подготвување, такви печурки предизвикуваат халуциноген ефект по 20 до 45 минути, а „хај“ состојбата трае и до девет часа.

„Најпрво ти се крева адреналинот, весел си, поподвижен и добиваш сила. Потоа почнуваш да халуцинираш, слушаш гласови, гледаш духови, чудно ти е се'. Се губиш, се наоѓаш во некој свој свет, тешко зборуваш, се движиш без компас. На крајот, заспиваш во длабок сон“, објаснува поранешен зависник од дрога.

При користењето на овие дроги, се забранува консумирање алкохол, бидејќи оваа комбинација може да предизвика труење или многу силна халуцинација од која може да се имаат ментални последици. Исто така, се препорачува во никој случај да не се вози, бидејќи консументите губат допир со реалноста.

Магичните печурки се сушат и се јадат или се варат во чај. Тие се барана стока и на македонското мени.

„Може да се најдат и кај нас, ама не секаде. Тие претежно се употребуваат во земјите од Западна Европа“, укажуваат познавачите.

Тие објаснуваат дека дел од печурките може да се најдат по ливадите и парковите, само треба да се препознаат. Притоа треба да се биде многу внимателен за да не се наберат смртоносни печурки.

„Една доза од грам или грам и пол, во Скопје може да се набави за 10-15 евра“, тврдат нашите соговорници.

На европските пазари, претежно во Холандија, има околу 25 видови на печурки со халуциногено дејство. Сепак, пред неколку години, тамошните власти предложија забрана на халуциногените магични печурки, чија продажба е легална во специјализираните продавници. Иницијативата следуваше по низа несреќни случаи. Тинејџерка скокна од мост во Амстердам, турист од Исланд се фрлил од балкон, а Данец возел автомобил неконтролирано меѓу шатори во камп.