Чистка на луѓето блиски до градоначалникот на Битола

Поднесена е кривична пријава против директорот на Домот за старци „Сју Рајдер“ за злоупотреба на службена положба

Битола - Полицијата поднесе кривична пријава за директорот на старечкиот дом „Сју Рајдер“ во Битола, Благој Илиовски (49). Го сомничи за злоупотреба на службената положба со што, во изминативе четири години ја оштетил касата на Домот за околу 8.000 евра, набавувајќи храна за штитениците. Истражен судија му одреди мерка притвор.

Граѓаните коментираат дека битолската полиција брка криминалци од власта, зашто ова е втора кривична пријава за период од неколку дена. Претходно пријава за даночно затајување доби директорот на индустриската зона „Жабени“. Опозицијата од градот смета дека ова е силен политички удар за градоначалникот Владимир Талески, бидејќи се апсат луѓе блиски до него.

„Пријавениот во декември 2010 година на магационерот на Домот му доставил две фактури со листа на прехранбени производи во износ од 360 илјади денари и напишал да се исплати. Иако бил предупреде�� дека ги имаат производите на резерва, сепак, не отстапил. Парите биле буџетски од календарската 2009 година и ако не се искористеле до крајот на 2010, ќе требало да ги повлече Министерство за труд и социјална политика. Фактурите биле исплатени за производи кои никогаш не пристигнале до магацинот на старечкиот дом“, рече Ѓоко Стрезовски, портпарол на СВР Битола.

И лани во пет наврати без никаква постапка за набавки од мала вредност по налог на директорот биле исплатени фактури во износ од 115 илјади денари за производи кои никогаш не влегле во домот. Од полицијата велат дека работат и на други инкриминирани дејства за пријавениот директор.

Но, покрај финансиските малверзации, полицијата ќе испитува и дали директорот Илиовски вршел мобинг врз некои од вработените. Во судот во Битола веќе се води спор по тужба на една вработена во домот која го обвини директорот за обид за силување.

Последните случувања во градот не останаа незабележани од битолската опозиција. Опозиционерите велат дека тимот на градоначалникот се распаѓа на сите страни и по сите основи. Според либералдемократите, до Талески во моментов стојат луѓе за кои се поднесени кривични пријави за затајување данок, за повластување на доверители, за сексуални напади на вработени, пријави за уништување и фалсификување деловни книги.

„Директорот на старечкиот дом во Битола по скандалот со сексуалниот напад на една од своите вработени, вчера бил повикан на информативен разговор во полиција поради финансиски неправилности во работењето и мобинг врз своите вработени. Одреден му е притвор. Ако на ова се додаде дека и Димче Шеровски, директорот на ИЗ ’Жабени‘, доби кривична пријава за даночно затајување, останува ли некој околу Талески кој не е осомничен за криминал? Се поставува логично прашањето, ако сите околу градоначалникот се осомничени, како тоа тој е изненаден, или можеби е толку чист, па ништо не знаел што работеле овие околу него“, запраша Владо Атанасовски, секретар на ЛДП Битола.

Според ЛДП, доскорешниот лидер на ВМРО-ДПМНЕ во Битола, Јовко Крстевски, од директорското место во ЈП „Комуналец“ заминал на државна работа во РЕК Битола. Од партијата прашуваат дали со тоа само полесно ќе се скрие од истрагата, која се води против него за наводно оштетување доверители додека бил претседател на ФК „Пелистер“, за што пишуваше „Македонски спорт“.