Опозицискиот фронт ќе покаже заби по Чикаго

Од СДСМ се внимателни во коментарите за формирањето на миниопозициски блок и ќе остават да видат како ќе се развиваат работите

Светлана Унковска



Судбината на дефинитивното окрупнување на опозицискиот фронт најверојатно ќе се знае во текот на идниот месец, односно по одржувањето на Самитот на НАТО во Чикаго, дознаваме од партиски извори блиски до левицата и до вонпарламентарната десница. Во случај по Чикаго се' да остане статус кво со нашето членство во НАТО, што е најверојатна можност, тогаш и конечно ќе следи објавувањето на опозицискиот фронт кои здружени ќе настапат на локалните избори. Овие избори за нив ќе бидат и тест, односно своевидно одмерување на силите за наредните парламентарни избори.

Интересот што во јавноста го предизвика оформувањето на мини-вонпарламентарен опозициски блок на ВМРО-Народна партија, Достоинство, Обединети за Македонија и Либерално-демократска партија отвори бројни калкулаци и опции за тоа како ќе се одвиваат работите и релациите со СДСМ при формирањето на најавениот широк опозициски фронт.

Од СДСМ се внимателните во оценките и коментарите околу завчерашното формирање на овој блок и велат дека за сега ќе остават да видат како натаму ќе се развиваат работите.

„Ја поздравуваме идејата на јакнење на соработката на опозициските партии. Врз основа на изјавите на лидерите на партиите јасно е дека делиме исти оценки за катастрофалната ситуација во која се наоѓа Македонија пред се' заради погрешните политики на актуелната власт. Се надеваме дека во наредниот период ќе се создадат услови и амбиент за целосно окрупнување на опозицискиот фронт“, велат од најголемата опозициска партија.

Тоа што лебди како голема дилема е како овие партии кои немаат ниту приближни идеологии и ставови ќе излезат пред гласачите. Најголем дел од приврзаниците на Георгиевски и помалите десничарски партии во Црвенковски гледаат и најголем непријател, што ќе биде тешко да се убедат да гласаат за нив.

И покрај тоа што кај овие партии постојат меѓусебни разлики и спротивставени идеолошки опции, што е особено изразено меѓу десничарските партии и опозициската СДСМ, сепак идејата за заеднички настап е единствената точка која успева да ги зближи, велат наши извори. Но и во оваа ситуација вонпарламентарниот опозициски блок покажа дека нема веднаш да даде карт-бланш за обединување со опозицискиот фронт, и покрај тоа што претседателот на СДСМ Бранко Црвенковски порача дека соработката ќе се одвива на рамноправно ниво.

И самата порака што произлезе од средбата на „Пелистер коалицијата“ дека се' уште е рано за разговори со Црвенковски и дека тие нема да брзаат, говори дека до средба ќе дојде кога ќе бидат сигурни дека преговарачките позиции ќе бидат на еднакво ниво со најголемата опозициска партија.