Декларација за НАТО - зошто?

Определбата на Македонија за членство во НАТО никогаш не била доведена во прашање и оттука е нејасно зошто се прави театар за јавноста

Жаклина Хаџи-Зафирова



Уште пред да биде изгласана, Предлог-декларацијата за реафирмирање на реализацијата на стратешката цел за членство на Македонија во НАТО доби амин од опозицијата, но поддршката ја изразија со резерва дека нешто ќе се постигне со овој документ. Документот, кој завчера го поднесоа ВМРО-ДПМНЕ и ДУИ, доби поддршка од сите партии, со исклучок на ДПА кои оценија дека се работи за „празна демагогија“. Предлог-декларацијата се носи во пресрет на долгоочекуваниот Самит на НАТО во Чикаго, кој е планирано да се одржи кон крајот на мај, за што постојат сомнежи кај опозициските партии дека овој настан може да биде пресвртница за иднината на земјата пред да се реши проблемот со името.

Во Предлог-декларацијата која до сите парламентарни партии ја поднесоа двете најголеми владејачки партии се потенцира дека интеграцијата на земјата во НАТО треба да биде главната политичка определба и цел на сите политички партии, општествени чинители и граѓани. Декларацијата повикува на почитување на принципите на отворени врати на НАТО и се посочува дека земјата ги има исполнето сите критериуми и услови за членство во НАТО. Во неа, исто така, се бара да се уважи пресудата на Меѓународниот суд на правдата во Хаг и препораките од таа пресуда кои се во функција на објективно отсликување на состојбите кои имаат влијание на евроатлантската интеграција на Македонија.

Најголемата опозициска партија, СДСМ ја поддржи Предлог-декларацијата. Пратеникот на СДСМ Андреј Петров од собраниската говорница порача дека даваат „искрена поддршка од опозицијата за една стратешка цел“. На барање на СДСМ, документот кој беше потпишан од опозициските партии беше ставен за прва точка на дневен ред. Тој изрази жалење што на седницата не присуствуваат претседателот и премиерот.

„Заклучуваме дека власта има план како да ја внесе Македонија во НАТО на претстојниот Самит во Чикаго. Затоа ја поддржуваме декларацијата и очекуваме резултати“, изјави вчера Петров. Тој рече дека за СДСМ највисок приоритет се евроатланските интеграции на Македонија. Петров нагласи дека доколку владејачкото мнозинство смета дека со оваа декларација на Владата ќе и' се олесни работата за членство на Македонија во НАТО на мајскиот Самит во Чикаго, тогаш безрезервно ќе ја поддржат.

Поддршката за Предлог-декларацијата за членство на Македонија во НАТО вчера од собраниската говорница ја дадоа и НСДП, ЛП, ПЕИ и СЛ. Зборувајќи за проблемот со името, Тито Петковски од НСДП изјави дека треба да се дискутира за овој проблем и да се обезбеди национално единство. Според него, времето не е наш сојузник и може лошо да се одрази на стабилноста на државата. Тој потенцира дека документот не е патот што води кон НАТО, туку дека државниот врв треба да понуди алтернатива за државата.

Додека, Сафет Бишевац од СЛ оцени дека се работи за „обичен маркетиншки ефект“ и дека на сите ни е јасно дека таа цел нема да биде остварена.

Имер Алиу од ДПА образложи дека не ставиле потпис на декларацијата бидејќи нејзиното носење го сметаат за „празна демагогија“. „Не знам каде се гледа оправданоста за оваа декларација кога се знае јасно дека услов за членството е Македонија да го смени името“, рече Алиу, посочувајќи дека со декларацијата се прави обид да се покрие неспособноста за на��ѓање решение за името.