Промовиран порталот КупиКнига.мк

Порталот беше поставен пред три месеци и досега нуди над 10.000 книги на македонски, српски, албански и на англиски јазик, од над 500 издавачи

Компанијата iVote денеска го промовираше порталот www.KupiKniga.mk, каде може да се купат сите книги од сите домашни издавачи, но и од регионот, и тие да бидат доставени на адреса. Порталот беше поставен пред три месеци и досега нуди над 10.000 книги на македонски, српски, албански и на англиски јазик, од над 500 издавачи, македонски и странски. Распоредени се во 92 категории од повеќе од 6.000 автори.

- Идејата се роди пред шест месеци со цел да се олесни пристапот до книгата и читателите да не ја бараат од книжарница во книжарница, особено тие од внатрешноста на државата, каде што сега се половина од нарачките. Останатите 50 отсто се барања од Скопје, рече Томислав Зографски од iVote, македонска софтверска компанија, специјализирана за развој на сигурни интернет решенија.

Тој посочи дека купувањето од порталот е сигурно, едноставно и со поволни цени. Купувачите избираат книга, плаќаат со кредитна или дебитна картичка и книгата им се испорачува. Најевтина е препорачаната испорака, 99 денари, а има и брза испорака во соработка со ДХЛ. За книги од Македонија се чека 4-5 работни дена, а за изданија од Србија до три недели. За нарачки над 990 денари, испораката на книгите е бесплата за цела Македонија.

Некои домашни издавачи се согласиле да бидат дел од опцијата „Прелистај’’ што ја нуди порталот, каде што може да се прочитаат првите 20-ина страници од книгата.

За три месеци имало 167.000 прегледи на веб-порталот и над 1.500 регистрирани читатели.