Поглед

Амин за протест

Соња Маџовска

Ќе има протест со амин на министерот за здравство Никола Тодоров. Лекарите ќе се откажат од појадокот, тие денеска ќе протестираат само половина час, за време на паузата во круговите на установите.

Се поставува прашањето дали наместо тужби и судски одлуки за да се одложи штрајкот на лекарите, можеше многу побезболно да се заврши целата работа, со договор меѓу министерот и синдикатите.

Тие вчера успеаја да се договорат дека по протестот ќе преговараат

за да се надминат проблемите. Министерот Тодоров, за разлика од претходните денови, излезе со многу посмирена реторика, уверувајќи ги лекарите дека нема ништо против одржувањето протест со кој се гарантира уставното право на синдикатите да манифестираат незадоволство од определени одлуки. Тој порача дека е задоволен затоа што протестот нема да се реперкуира врз пациентите, односно врз редовното функционирање на здравствените установи.

Она што вчера се случи, всушност, требаше да биде договор уште пред еден месец. Ако тогаш министерот уште при најавата за штрајк, покажеше поголема флексибилност и седнеше да преговара со лекарите за нивните барања околу исплатата на платата по успешност, денеска најверојатно и немаше да има потреба од одржување на протест. Но, наместо тоа, се дозволи состојбите да ескалираат, па да мора да се смируваат.

Тоа дека лекарите се незадоволни со реформата во делот на платите, министерот добро го знаеше.

Никој нема ништо против реформи, но кога веќе се преземаат толкави големи промени, редно е тие да бидат усогласени во најголем дел со оние на кои се однесуваат.