Македонци уапсени во Полска за производство на цигари за шверц

Полската полиција уапси осуммина Македонци кои во нелегална фабрика во Лоѓ, за полски сопственик, призведувале цигари наменети за шверц.

Уапсени се и двајца полски државјани кои работеле како обезбедување. Главен организатор на полско-македонската организирана група и работодавач бил 36-годишен Полјак, пренесува Дојче веле.

- Во фабриката се запленети два тони тутун, 165 илјади цигари, милион филтери и 700 илјади празни картонски боксови за пакување. Во две хали со површина од по околу 1.500 метри квадратни полицијата нашла технолошка линија за производство на цигари на која работеле осуммина Македонци на возраст од 27 до 60 години, изјави портпаролката на полицијата во Лоѓ, Јоана Качка.

Сите единаесет мажи се уапсени, а Централното истражно биро ги обвини за учество во организирана криминална група која се занимавала со нелегално производство на цигари. За тоа на обвинетите им се заканува казна од пет години затвор, а на Полјакот, организатор и шеф на нелегалната работа, до 10 години затвор.