Мистериозна кражба на главната пошта во Битола

Битола - Околу два милиони денари е пленот со кој заминале разбојниците кои ја ограбија главната пошта во Битола. Вработени во поштата утрово околу 5 часот забележале дека некој насилно влегол во објектот на Македонски пошти лоциран во строгиот центар на градот и кражбата ја пријавиле во полиција.

По увидот на Истражен судија и полицијата е констатирано дека непознати сторители го одзеле сефот на поштата во кој имало пари и разни пратки. Грабежот се случил најверојано во периодот по 21 часот во саботата, па се до понеделникот утрото кога поштата била без обезбедување. Претпоставките на полицијата се дека крадците најпрво го скинале катанецот од синџирот од металната двокрилна влезна врата од дворот на поштата, потоа влегле внатре во објектот и од пакетското оддел��ние го одзеле сефот, кој бил со висина од еден метар и длабочина од 60 сантиметри, и тежок неколку стотина килограми. Полицијата соопшти дека презема мерки за пронаоѓање на крадците.

Кој го украл сефот на главната пошта во Битола и колку пари имало точно во него, се дел од дилемите кои се отворија по последниот грабеж. Тој се случува неколку недели, откако во градот под Пелистер се зборуваше за кусок од 1,8 милиони денари во касата на поштата, за што наводно била вклучена и внатрешната контрола. Дека има кусок во касата тврдеа и вработени во поштата, но ниту полицијата, обвинителството или пак првите луѓе на поштата официјално не ја потврдија оваа информацијата. Првиот човек на поштата, кој е кадар на ДУИ, на телефонскиот повик на новинарите не сакаше да одговори на прашањето дали навистина е утврден кусок на пари во поштата.

Дел од вработените денеска ја спомнаа можноста дека сефот најверојано бил празен, бидејќи парите собрани од сите пошти во Битола биле оставени во вреќи на едно од бироата, а не во металниот сеф.

Според кажувањата на вработените, сефот тежел нешто повеќе од 400 килограми и за да биде однесен од објектот на поштата, најверојатно биле потребни не еден или двајца, туку најмалку осум лица за да го сторат тоа. Ова не е прва кражба на пошта во градот. Поштите беа ограбувани во неколку наврати во последните неколку години.(А.Б.)