26.09.2011, 15:01 Зголемена довербата во Иванов
Се подобрува јавното мислење за работата на претседателот на Република Македонија Ѓорге Иванов, покажува телефонската анкета спроведена од Институтот за политички истражувања од Скопје (ИПИС) врз репрезентативен примерок од 1.110 испитаници.
Од испитаниците 53,4 отсто имаат позитивно мислење за работата на претседателот, 28,1 негативно, а 18,5 отсто одговориле дека не знаат или немаат одговор.
Анкетата, спроведена во периодот од 16. до 20. овој месец, е дел од редовните мерења на ставовите на граѓаните во однос на нивната доверба и перцепции за работата на претседателот на Република Македонија.
Во претходно спроведените анкети од ИПИС позитивно мислење за работата на претседателот Иванов имале 45,7 отсто од испитаниците во октомври 2010 година, 47 отсто во декември истата година и 49,3 отсто во мај годинава.
Негативно мислење за работата на претседателот имале 44,8 отсто од испитаниците во октомври 2010 година, 42,3 отсто во декември истата година и 36,7 отсто во мај годинава.
|
