Тричковски и Апоел по нов успех во Донецк

По победата над Зенит во првото коло, тимот од Кипар вечерва ќе бара изненадување и против Шахтјор

По победата над Зенит во првото коло на свој терен македонскиот репрезентативец Иван Тричковски со својот Апоел гостува кај украинскиот Шахтјор.

Тимот што победува не се менува. Апоел нема потреба да го прави спротивното. Во Украина ќе нападне со херојот од првиот меч Аилтон, кому друштво ќе му прават Мандука и нашиот Тричковски.

Шахтјор е силен тим. Тоа го знаат Кипраните. Украинците лани играа четвртфинале и немаа пораз на свој терен во групната фаза, вклучувајќи ги тука и победите над Арсенал.

„Искрено не се надеваме на победа против Зенит во првото коло, но тоа на крајот се случи. Нема од што да стравуваме против Шахтјор. Тие први три бода многу значеа за нашата самодоверба. Одиме во Украина по нов успех“, порача Тричковски.

Најинтересно се очекува да биде во групата Е на мечот Валенсија - Челзи. Тоа ќе биде прв настап на новото засилување за лондончаните, Хуан Мата, пред довчерашната своја публика со која беше емотивно врзан.

Валенсија има лош ефект со англиските претставници. Има само две победи во 10 меча, а нема триумф од 2002 година. Шпанците вечерва ќе го имаат најсилниот состав, што значи дека во првиот тим се враќаат оние што против Севилја стартуваа од клупата (пораз од 0:1) - Албелда, Хернандез и Солдадо.

На спротивната страна ќе го нема само Михаел Есиен. Тренерот на Челзи, Андре Вилјаш Боаш, е оптимист.

„Имаме четворица одлични напаѓачи - Лукаку, Ањелка, Дрогба и Торес. Сите конкурираат за нашиот систем на игра 4-3-3. Валенсија е силен тим. Негува напаѓачки стил на игра. Мора да ја задржиме топката во своите нозе. Така ќе ја прекинеме нивната брза игра“, потенцира Боаш.


Група Е

Баер Леверкузен - Генк, Валенсија - Челзи
Табела: Челзи 3, Валенсија 1, Генк 1, Баер Леверкузен 0


Група Ф

Арсенал - Олимпијакос, Марсеј - Борусија Дортмунд
Табела: Марсеј 3, Арсенал 1, Борусија Дортмунд 1, Олимпијакос 0

Група Г

Зенит - Порто, Шахтјор - Апоел
Табела: Порто 3, Апоел 3, Шахтјор 0, Зенит 0

Група Х

Милан - Плзен, Бате Борисов - Барселона
Табела: Милан 1, Барселона 1, Бате Борисов 1, Плзен 1