За 390 евра до Дубаи и назад



Секој понеделник и четврток Скопје директно ќе се поврзе со Обединетите Арапски Емирати

За 390 евра за повратен билет, македонските граѓани од денеска можат да патуваат до Дубаи. Авионот на компанијата „Флајдубаи“ денеска за прв пат слета на скопскиот аеродром „Александар Велики“, а во иднина двапати неделно, секој понеделник и четврток директно ќе го поврзе со Обединетите Арапски Емирати. Новата дестинација ќе им овозможи на граѓаните на Македонија, преку Дубаи да се поврзат со 150 други дестинации, вклучувајќи ги Австралија, Авганистан и Далечниот Исток.

Како што најави Гаит Ал Гаит, заменик-извршен директор на „Флајдубаи“, Скопје ќе биде регионален центар на компанијата за овој д��л од светот, а можно е во иднина да бидат воспоставени и повеќе летови во неделата. Според него, директното поврзување на Скопје и Дубаи ќе донесе и повеќе туристи Емиратите кои сакаат да ја запознаат Македонија. Авиокомпанијата ќе посредува и меѓу македонските граѓани и институциите во Емиратите за издавање на визите за влез. Ал Гаит најави дека апликациите ќе се препраќаат по електронски пат и ќе бидат готови за 24 часа.

Авионите од Дубаи секој понеделник и четврток ќе полетуваат 9,15 часот, а ќе слетуваат на „Александар Велики“ во Скопје во 12,40 часот. Повратниот лет ќе го напушта главниот град на Македонија во 13,25 часот, а ќе пристигнува во Дубаи во 20,35 часот по локално време. Во цената од 390 евра се вклучени сите аеродромски такси и багаж до 20 килограми, едно парче рачен багаж до седум килограми и еден мала рачна или лаптоп-торба. За седиште со дополнителен простор за нозете се доплаќа 21 евро. Во леталото, патниците можат да изберат од долгата листа понуди, што вклучува пакети за забава во текот на летот со цена од 2 евра. Билети за можат да се купат од официјалната интернет-страница на компанијата „Флајдубаи“ (С.Н.)