Снегот и мразот опасни за пешаците, но и за возачите

Возрасните се движеа внимателно поради опасноста од паѓање. На снегот најмногу му се израдуваа децата

Снежана Калабакова



Новиот снег и ниските температури што ја зафатија Македонија вчера го отежнаа одвивањето на сообраќајот, но и движењето на пешаците. Снегот ги покри замрзнатите површини и ја зголеми опасноста од паѓање и здобивање скршеници, па затоа многумина се движеа со страв. Снегот вчера ги фати општинските служби неспремни, па тие потфрлија во расчистување на улиците.

АМСМ соопшти дека на сите магистрални и регионални патни правци низ земјава сообраќајот се одвива отежнато и забавено, по влажни и лизгави коловози, особено во западниот дел. Поради големите количества остатоци снег по коловозите, на патните правци Гостивар - Кичево преку планинскиот преслап Стража и на кракот Маврово - Дебар вчера беше воведена забрана за движење на тешки товарни возила. Од Меѓуградската автобуска станица и од Железничката станица информираа дека без задоцнувања тргнуваат и пристигнуваат и автобусите и возовите.

Најмногу снег наврнало во Дебар, каде што вчера попладне е измерена снежна покривка од 40 сантиметри, на Попова Шапка 37, а 35 сантиметри беа измерени на Маврови Анови. Управата за хидрометеоролошки работи соопшти дека во Лазарополе е формирана снежна покривка од 30 сантиметри, а на Кожуф 25 сантиметри.

Метеоролозите и за наредните денови најавуваат мошне студено време, со ниски температури во утринските часови. Денеска и утре врнежите од снег ќе бидат повремени, а ќе ги има во западните делови од земјава. Од понеделник утринските температури ќе бидат под нулата, во интервал од минус 8 до минус 2 степена. Студенилото ќе се почувствува од вторник до четврток кога наутро живата ќе се спушти меѓу минус 13 и минус 4 степени.