Евакуација

Странците го напуштаат Египет

31.01.2011, 10:31

Повеќе европски држави ги предупредија своите граѓани да го напуштат Египет, иако засега нема информации за инциденти во кои се вмешани Европејци или Американци.

Холандското Министерство за надворешни работи упати повик до своите граѓани „сериозно да размислат за евакуација“. Во петокот, според официјални податоци, во Египет престојувале три илјади Холанѓани, од кои 1.400 веќе биле на пат за дома.

Швајцарија исто така апелираше до своите граѓани да ја напуштат земјата „поради нестабилната ситуација“ и им порача да се воздржат да патуваат во Египет.

Предупредувања да се ограничат патувањата во Египет беа упатени и од министерствата за надворешни работи на Данска, Норвешка, Ш��едска и Финска. Во одмаралиштата Шарм ел Шеик и Хургада минатата недела биле регистрирани 21.500 туристи од скандинавските држави.

Белгиските туроператори соопштија дека од денеска почнуваат да ги евакуираат своите туристи од Египет.

САД исто така ги посоветуваат своите граѓани да го напуштат Египет. Од Амбасадата на САД во Каиро се евакуирани вработените во помошните служби и семејствата на сите вработени и дипломати.

Турција синоќа врати 1.444 турски државјани од Египет, за што беа искористени авиони на турските авиолинии. Уште 330 лица биле изнесени од земјата вчера.