Медиумите на Рамковски ќе работеле и без сметки

Уредниците на медиумите на „Перо Наков“ се загрижени како ќе опстојуваат во иднина

Светлана Унковска
Горан Адамовски

Без можност за одржување на редовните трошоци за бензин, телефон, дистрибуција, печатење и плати за вработените, телевизија А1 и дневните весници „Време“, „Шпиц“ и „Коха е ре“ тешко ќе можат да опстојат. Ваков е ставот на дел од главните уредници на медиумите адресирани на „Перо Наков“ во Скопје откако судот, по барање на Обвинителството, им ги блокира банкарските сметки.

А1 телевизија веќе два дена емитува отворена програма од пред Владата. Оттаму се јавуваат со вести, отворени програми и дебатни емисии. Според главниот и одговорен уредник на телевизијата, Младен Чадиковски, одлуката на судот е притисок и оневозможување на непречено работење на медиум, кој важи за критички настроен кон власта.

„Ние сме, практично, оневозможени нормално да функционираме. Не можеме да ги намируваме редовните трошоци за бензин и за телефон. Не знам како ќе продолжиме во иднина, ама ако треба, и без плата да земеме, нема да се откажеме се' додека целата јавност не сфати дека ова што ни се случува не е дел од судска постапка, туку најдиректен обид да се замолчи медиумот“, вели Чадиковски.

Откако во четврточната вечер новинарите и вработените во телевизијата работеа под отворено небо, вчераутро, сепак, поставија висока и широка тенда, а донесоа и неколку плински боци за да се згреат. Дали тендата е законски поставена - беше прашањето што ги интересираше неколку полицајци што дојдоа во „кампот“ на А1 пред Владата. По кратко време, тие си заминаа.

„Тендата ја поставивме барем малку за да се заштитиме од студот, снегот и од дождот. Дали имаме дозвола - не знам, работата ја тера нашата правна служба“, објаснува Чадиковски.

Главниот уредник на „Шпиц“, Бранко Героски, вели дека за наредните денови ќе ги користат залихите на репроматеријали потребни за излегување на весниците на „Плус продукција“, чија сметка, исто така, е замрзната. Според него, доказ дека власта на овој начин се справува со медиумите е тоа што наместо да им го оневозможува нормалното функционирање со блокирање на сметките, одлуката би требала да биде насочена во замрзнување на имотот, кој има многу поголема вредност.

„Се надеваме дека во наредните неколку дена ќе се најде начин да се деблокираат сметките, бидејќи за нас е несфатлива одлуката што директно е насочена кон запирање на весниците, а не кон остварување правна одлука. Потегот на власта е акт на државна цензура, бидејќи мерките се насочени кон медиуми чија работа е мошне чувствителна. Очигледно е дека има тенденција да се спречи нивната работа, а тоа е насочено со оневозможување да се намируваат најбаналните трошоци“, вели Героски. Според него, симтоматично е тоа што потегот на власта за замрзнување на сметките дошол само неколку часа по објавувањето на интервјуто со американскиот амбасадор Филип Рикер, кој рече дека затворањето на една телевизија што има критички однос кон Владата ќе повлече многу прашања. Очекуваат реакции и од други претставници на меѓународната заедница во земјава, но и директно од Брисел. Героски со апел се обрати до колегите од другите медиуми.

„Мислам дека по овие последни дејства на власта, веќе се' е јасно и веќе не може да се најде оправдување за гледање сеир, за лажни симетрии и за анемични реакции на колегите“, порачува главниот уредник на „Шпиц“.

И главниот уредник на весникот „Време“, Коле Чашуле, вели дека во редакцијата сите се мобилизирани и се вложуваат максимални напори за работата да тече нормално. „Моментално се трудиме да направиме се'за весникот нормално да излегува, но проблемот не е во нашата желба и труд, туку прашањето е до каде се подготвени да одат. Од ноември наваму власта презема секакви мерки да не' спречи во функционирањето, па дури и да престанеме да излегуваме. Со постојните капацитети ќе правиме се' да не се случи тоа, но состојбата е многу сериозна. Не знам дали се размислува како ова, да се атакува на четири медиуми да згаснат преку ноќ ќе се одрази на нашата земја“, истакнува Чашуле.

Во четвртокот, од кога А1 ја води програмата на отворено пред владината зграда, заедно со новинарите од редакциите на весниците, со соопштение се огласи и Владата, која го нарече протестот обид за манипулација и злоупотреба на моќта на медиумот за да се наруши имиџот на власта.

„Протестот пред Владата што го организира група вработени во компании со седиште на ’Перо Наков’, кои се дел од предмет што е во судска постапка, е несоодветен и беспредметен. Тоа е манипулација и злоупотреба на општествената позиција со претходно проектирана цел за нанесување штета на имиџот на Владата, во функција на остварување лични интереси на поединци и партии“, се наведува во владиното соопштение. (Св.У.-Г.А.)