Египет

Евакуација досега побарале 34 Македонци 

31.01.2011, 11:48

Триесет и четири македонски државјани  досега се обратиле до Амбасадата на Република Македонија во Каиро со барање за помош за евакуација од Египет, поради ескалацијата на нередите во земјата.

Нивното враќање се договара заеднички во координација со Амбасадата на Босна и Херцеговина. Македонските и босанските државјани најверојатно ќе се евакуираат со чартер лет до Скопје или до Сараево.

Меѓу македонските државјани кои побарале помош нема туристи. Сите живееле или работеле во Египет. Од македонското Министерство за надворешни работи велат дека се во постојан контакт со Амбасадата во Каиро, но нема точни сознанија колку Македонци живеат, работат или се во посета на Египет во моментов.

Според информациите од Македонската амбасада, состојбата во Египет се влошува. Во текот на денот во египетското МНР ќе биде одржана средба на сите странски амбасадори на која ќе бидат информирани за најновите случувања во земјата. По консултација и координација со дипломатските претставништва на земјите од ЕУ во Каиро, ќе се реши дали Македонската амбасада привремено ќе биде затворена, а амбасадорот Миле Манолев вратен во Скопје.

МНР апелира македонските граѓани кои планираат да заминат за Египет, ако е можно, да го одложат своето патување до смирување на ситацијата во земјата.