Поглед

Зошто во Египет?

Тамара Грнчароска

Египет е во хаос и можеби пред преврат. Насилни протести по улиците со човечки жртви, додека во државата не функционираат Интернетот и мобилната мрежа. Египет е следна држава во која може да се случи Тунис. Но, до вчера тоа не беше пречка премиерот Никола Груевски да се подготвува за посета на Каиро и за средба со Хосни Мубарак против кого се насочени протестите во Египет.

Добро е што вчера премиерот, сепак, реши да не патува бидејќи посета на држава каде што се во тек протести против власта или каде што се подготвуваат избори, во дипломатијата се смета како давање политичка поддршка на властите во таа земја. Да не зборуваме за безбедносните ризици на кои би се изложил премиерот со тоа патување.

Сепак, �� покрај одложувањето на посетата на Египет, останува нејасно претходното тактизирање и одолговлекување на премиерот да ја откаже посетата на Египет. Доколку Груевски не беше свесен за моментот во кој избра да го посети Каиро, зарем околу него нема никој за да го посоветува како би била протолкувана неговата посета во ваков суптилен политички момент? Требаше медиумите да се прашаат дали е погоден моментот за посета на Египет, па на „Илинденска“ б.б. да размислат што прават?

Ако ништо друго, ова нека им биде пример на премиерот и на другите наши официјални претставници во иднина да избираат вистински тајминг кога се посетуваат странски држави и кога се остваруваат контакти со други државници. Еве, нека се присетат само кој ја посети Македонија пред изборните циклуси што досега ги имавме во земјава и како тоа беше политички прочитано во земјата. За револуции и протести, пак, нека си го вратат филмот на случувањата во Албанија, Србија, Белорусија, Украина, па еве ако сакаат и во Тунис, и добро да размислат каде и кога се оди.