Шврговски: Го браниме интересот на државата

Јавното обвинителство ќе одлучи до кога ќебидат блокирани сметките на 11 фирми на Велија Рамковски

Љубиша Станковиќ

„Замрзнувањето на сметките на 11 фирми на ’Перо Наков‘, меѓу кои и на А1 телевизија е законско, по барање на Јавното обвинителство. Станува збор за привремено замрзнување на банкарските сметки на фирмите, со цел обезбедување парични средства, кои се дел од истрагата за даночно затајување“. Ова е објаснувањето на надлежните судски органи на одлуката за блокирање на сметката на А1 телевизија и на уште десетина фирми на Велија Рамковски, што предизвика жестоки реакции.

Додека за вработените блокирањето на сметката е директен удар врз слободното новинарство и демократијата, за државните органи блокадата претставува сосема логичен потег. Според Јавното обвинителство што го поднело барањето, и судот што ги одобрил сите барања за блокада, ова е обид за заштита на државата, со цел запирање на неплаќањето данок.

Сопственикот на фирмите, Велија Рамковски, и уште дваесетина негови соработници беа приведени во декември лани во акцијата „Пајажина“ поради даночно затајување, перење пари, злосторничко здружување и други кривични дела.

Блокирањето на сметката на А1 телевизија се случува два месеца од влегувањето на инспекторите на Финансиската полиција и на Управата за јавни приходи во фирмите на „Перо Наков“, со цел проверка на наводите за избегнување плаќање данок и други давачки кон државата.

Најновата блокада на сметките што се случи во средата е по барање на Јавното обвинителство, кое смета дека големите долгови кон државата можат да се намират исклучиво со блокирање сметки.

„Точно е дека во средата поднесовме барања за блокирање сметки, меѓу кои и на телевизија А1, но точно е и тоа дека се работи за вкупно 11 компании, кои и досега беа предмет на истрага. Од сметките ќе бидат блокирани онолку средства за колку што има сомневања дека се затаени. Обвинителството нема ништо против доколку на сметката има повеќе средства од оние што ги побарува државата, компанијата да располага со тој вишок“, вели јавната обвинителка, Гордана Гешкоска.

Според неофицијални сознанија, некои од фирмите што се предмет на истрага и претходно биле блокирани по барање на други фирми што се јавуваат како доверители.

За случајот со блокираните сметки, вчера со конкретни бројки излезе јавниот обвинител Љупчо Шврговски. Според него, блокирањето на сметките претставува стандардна процедура кога има висок степен на сомнение, а со цел да се заштитат интересите на државата.

„Јавното обвинителство се грижи за заштита на интересот на државата. Не се работи за преседан, туку за стандардна процедура“, вели Шврговски и додава: „Никој нема ексклузивитет. Јавното обвинителство досега има поднесено ваква мерка против 25 лица и благодарение на тоа, бил обезбеден имот стекнат на криминален начин, кој на друг начин не сме можеле да го обезбедиме. Сугестиите на експертите од Европа се почесто да ги применуваме овие мерки за конфискација и замрзнување“, вели Шврговски.

Според Обвинителството, информациите дека се блокира работата на А1 телевизија се неточни. На сметката, според него, имало само 10 милиони денари, или околу 160.000 евра, и затоа ќе се замрзнуваат приливи се' додека не се стигне до сума од 4,4 милиони евра.

„Сочувствувам со негативните последици што ќе ги почувствуваат вработените. Тоа е моја лична емоција, но јас не сум задолжен за социјална политика, туку да ги бранам интересите на државата“, рече вчера обвинителот Шврговски.

Дека блокадата освен на А1 телевизија се однесува и на десет други компании со адреса на „Перо Наков“ број 60, потврдуваат и од скопскиот Кривичен суд.

„Во средата од Јавното обвинителство до нас беше доставени барање за блокирање сметки. Ние постапивме согласно со барањето на Обвинителството и решенијата за блокада беа доставени до банките. Блокирањето е во висина на која се однесува барањето, односно до одреден износ. Оние средства што се на сметка, а се над наведениот износ, не се наш предмет на интересирање. Истражниот судијата што ги донел решенијата за блокирање на сметките, согласно со законот, е должен да врши проверка на сметките“, ни изјави претседателката на скопскиот Кривичен суд, Лидија Неделкова.

Неделкова појаснува дека сметките ќе бидат блокирани се' додека тоа го бара Обвинителството. Дали и кога може да дојде до деблокада на сметките, засега е неизвесно. Евентуалната деблокада не зависи исклучиво од судот и од Обвинителството, туку и од Управата за јавни приходи што е компетента за утврдувањето на давачките кон државата.

Колкав е износот на затаените средства на фирмите „Акстра трејд“, „Време трејд“, „Плус продукција“, „Време Еч“, „Печатница Мисирков“, „Хедис ДОО“, „Синим ДООЕЛ“, „Унипроком Вемакс“, „Акс-стра ДООЕЛ“, „А1“, „А2“, „Стратус ДОО“, „Плус КОМ“, „Плус продукција“ и „Хедис маркети“, ќе треба точно да утврди експертски тим од вешти лица, а кои веќе од самиот старт на кривичната истрага добија судски налог за тоа. (Љ.С.)