Сметките на земјоделците подебели за 63 милиони евра

Владата објави дека сите 115 милиони евра наменети за поддршка на 171.000 земјоделци за оваа година се исплатени

Сања Наумовска

На сметките на македонските земјоделци за еден месец легнале 63 милиони евра за субвенции. Со нив е заокружена бројката од 115 милиони евра наменети за поддршка на 171.000 земјоделци за оваа година.

Најмногу 33 милиони евра биле исплатени за растителното производство, од кои 20 милиони евра за тутунарите. За сточарското производство субвенциите годинава изнесуваат 25,5 милиони евра, од кои 3,5 милиони евра се наменети за млекопроизводителите. Еден милион евра добиле производителите на органска храна, а 500.000 евра се доделени за премии и осигурување.

Како што информираше вчера премиерот Никола Груевски, вкупната поддршка за македонските земјоделци од 2006 година досега изнесува 500 милиони евра, а во следните три години се планира да им се исплатат уште 425 милиони евра субвенции.

Во екот на најголемата должничка криза македонските земјоделци за само еден месец од државниот буџет добија 63 милиони евра за субвенции. Ова е добра помош за аграрот и мотивација за земјоделците да го засилат производството и да влезат во нови инвестиции, истакна Груевски. Тој посочи дека Владата нема да отстапи од субвенционирањето на земјоделието ниту во иднина, а засилено ќе се работи и на обезбедување откуп и на промоција на домашните земјоделски производи.

Во периодот од 2006 до 2015 година треба да бидат исплатени 950 милиони евра субвенции. Со тоа ќе се отворат многу можности за земјоделците, за оние кои сега стопанисуваат, но и за други луѓе кои со оваа поддршка ќе најдат сигурен извор на приходи занимавајќи се со оваа дејност, посочи Груевски.

Најголем дел од субвенциите, како што информира вицепремиерот Зоран Ставрески, биле исплатени во општините Кавадарци и Неготино. На сметките на производителите од овој крај легнале 5,6 милиони евра. Во Битола се исплатени 4,9 мил��они евра, а во Велес 4,1 милиони евра.

Како директна последица на редовната исплата на државната помош расте и извозот на македонски производи. Пример, според министерот за земјоделство Љупчо Димовски, е извозот на праската, кој минатата година достигнал над 9.000 тони, односно пораснал над 600 отсто за последните неколку години. Според министерот Димовски, минатата година бил постигнат и рекорден извоз на вино, најголем за последните 20 години. Трендот, рече Димовски, продолжува и годинава, кога за првите 6 месеци се извезени поголеми количини вино од ланската рекордна година.