Мислења

Лажни патриоти, доста е!

Гордан Георгиев

Дојде време нашата власт да ја срка чорбата што сама ја подгреваше. И ќе ја срка. Но, за жал, денес цела Македонија, сите граѓани сме во истата чорба

ОЧИ ШИРУМ ОТВОРЕНИ

Се мислев дали да направам репринт на инкриминираната моја колумна „Патриоти, право у Ниш“, колумна којашто беше дочекана на нож од страна на медиумските трабанти на власта, поттикнати од штабот за комуникации и црна пропаганда на ВМРО-ДПМНЕ. Во таа колумна, се сеќаваат лажните патриоти од власта, им кажав во лице дека се манипуланти, дека се тоалетна хартија за еднократна употреба, дека пет пари не даваат за успесите на македонските репрезентации во кошарка и ракомет, дека на првата кривина ќе им свртат грб на нашите спортски херои.

Им кажав и дека оние малубројни, но многу гласни лажни навивачи кои, поттикнати од власта и аплаузите на претседателот Ѓорге Иванов да скандираат против „клетите Шиптари“ прават ненадоместливи штети на кревкиот соживот во Република Македонија. Им кажав, многу ги заболе. Денес, кога стивнаа страстите и кога Македонија е соочена со многу тешки предизвици, повеќе од јасно е дека ВМРО-ДПМНЕ бесрамно манипулира со спортот, го злоупотребува во популистички цели за да се подзаборави мизеријата во која сите ние живееме последниве шест години.

Да, македонската ракометна репрезентација загуби од Унгарија, Шведска и Бразил и не се пласиравме за Олимпијадата во Лондон. Како на тоа реагираа истите тие медиуми кои мене ме плукаа? По шема, ги исплукаа нашите репрезентативци, еден по еден, тренерот, раководството, сите! Не' исплукаа нас навивачите кои толку искрено и со љубов ја бодревме македонската репрезентација.

За огромна несреќа за сите нас, пред една недела се случи петкратното убиство кај Смилковци. Истите тие малубројни наапани навивачи, кои сложно влегоа во возовите и автобусите платени од власта, кои пееја против „клетите Шиптари“, а Ѓорге им аплаудираше, ги симнаа македонските дресови и се појавија пред Владата на т.н. „мирен протест“. Тука, пред Владата, најодвратно ги исплукаа нашите полицајци извикувајќи им „шиптарска полиција!“, а полицијата, инструирана да молчи, ги пушти да дивеат.

Ајде сега да ги видам „Сител“ и Миленко да направат телевизиски прилози за тоа како треба да се навива за Македонија. Да не пишува Драган Павловиќ патетични колумни за соживотот, бидејќи една колумна не може да ги измие сите пакосни работи што ги има кажано против соживотот во Македонија.

Да, дојде време нашата власт да ја срка чорбата којашто сама ја подгреваше. И ќе ја срка. Но, за жал, денес цела Македонија, сите граѓани сме во истата чорба. Епа, доста е веќе! Страотната трагедија шти ни се случи сите нам преку убиството на петмина луѓе, пукањето во секој од нас поединечно, мора да биде последната лекција за оваа власт.

Премиерот Груевски ни вчера на седницата на пратенички прашања не успеа да излезе од својата малодушна и одмаздничка логика. Замислете, во вакви тешки моменти за македонската држава, ја обвини опозицијата дека правела нереди и подбуцнувала тензии преку организирање на протести пред Владата. Премиере, освестете се, некои од луѓето што Ви беа пред Владата беа истите оние луѓе на кои Владата им плаќаше превоз „по случаен избор“ за да скандираат антимакедонски пароли на спортските натпревари. Да не ја имате сепак Вие мувата на капата? Да не случајно Вие или Вашите луѓе ги организираа и подбуцнаа овие момчиња? Со ваквите скандалозни тврдења, со ваквите лаги, Вие премиере, со ништо не помагате да се расветли случајот со петте убиства. Напротив, само дополнително ја матите водата. Прочитани сте, но овој пат тоа нема да Ви помине. Срамота! Вие и Вашите перјаници сте окупатори во сопствената земја, окупатори на сопствениот народ. А историјата не' учи дека на домашните окупатори им суди народот. Во домашните судови, регуларни или вонредни.

Во целата оваа перверзија, разбирлива е одлуката на премиерот да не ја разреши Гордана Јанкулоска. Во услови на распаднат безбедносен систем, во ситуација кога самата Јанкулоска признава дека не контролира речиси половина од територијата на Македонија (акцијата „Детонатор“), во фактички докажани случаи каде луѓе поставени од ДПМНЕ правеле криминал цели шест години, по грозоморно убиство на петмина невини луѓе, разрешувањето на Јанкулоска ќе биде признание дека секојдневниот страв и несигурност што го трпат граѓаните на нашата држава е резулт��т на свесно поставен (анти)систем од страна на власта. Тоа оваа гарнитура на ДПМНЕ не е способна да си го признае. Затоа одат до крај во легитимирање на системот. Затоа на крајот и ќе заглибат до крај. Јас само се молам да не не' вовлечат сите нас, граѓаните на Република Македонија, во нивниот демонски комар со иднината на државата.

П.С. Она што посебно ме погодува лично е тоа што во скандирањата против „клетите Шиптари“ како подлога се употребува македонската партизанска песна „А бре Македонче“. Велам ме погодува, бидејќи оваа химна на партизанското движење ја напишал мојот дедо Ордан Михајловски - Оцка, кој е убиен кога имал 20 години, во 1942 година, од страна на бугарскиот окупатор. Не можам да верувам дека оваа антифашистичка ода денес, во 2012 година, се користи за стимулирање на нов тип фашизам, несанкциониран и поттикнат од македонската власт.

(Авторот е пратеник и потпретседател на СДСМ)

Наш став



Објавувањето колумни и мислења од надворешни автори е одраз на намерата на „Утрински весник“ да биде влијателен глас на заедницата. Но, напоменуваме дека не се согласуваме секогаш со ставовите што ги изнесуваат нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на други личности од која било сфера. „Утрински“ се оградува од таквиот речник и конотации и ги смета за непримерни во јавната комуникација.