Иванов ем ги поддржува преговорите ем бара Грција да не' вика Република Македонија

„Грција мора да ја прифати новата реалност која се вика Република Македонија, вели претседателот за Евро њуз

Во интервју што викендов го даде, претседателот Ѓорге Иванов ги разбранува духовите и му порача на јужниот сосед да ја прифати Македонија под уставното име Република Македонија.

„Грција мора да ја прифати новата реалност која се вика Република Македонија. Македонците зборуваат македонски. Грците, пак, се уште ја имаат визијата од 19 век“. Ова е пораката која што викендов ја испрати претседателот Ѓорге Иванов преку европскиот телевизиски канал Евро њуз.

Една недела по изборите во Грција и составот на новата Владата, која покрај справувањето со економскиот колас на земјата, ќе треба да се фати во костец за решавање на долгогодишниот спор со името, претседателот Иванов со остра реторика на јужниот сосед му порачува да ја почитува реалноста и да се отвори за соработка, со цел излез од ќорсокакот.

На што се должи ваквата реторика и дали претседателот Иванов всушност праќа порака до Атина дека е против преговори за името? Ваквото прашање особено се наметнува по изјавата на Иванов дека во изминатиов период испраќал абер за дури четири средби со својот грчки колега, но на ниту на една од поканите не добил позитивен импулс и спремност за разговори од страна на Грција.

„Грците се убедени дека го создале митот за нивното постоење, во едно време во кое не можеа да се проверат фактите, немаше интернет и тие станаа непроменети во визијата кои самите ја создадоа“, вели македонскиот претседател во интервјуто за Евро њуз, одговарајќи на прашањето која порака би ја испратил до Атина за да се спречат натамошни блокади на интеграцијата на Македонија во ЕУ и НАТО.

Од новата грчка Влада, Иванов очекува соработка, не само на полето на економијата, културата и уметноста, туку и на политичко ниво, бидејќи последниве години, затаиле средбите на ова ниво.

„Постои соработка во економската област, културата, во уметноста. Има размена на уметници, музичари и студенти. Но, во текот на дваесетте последни години има мала соработка кога станува збор за средби на политички партии или на шефовите на државите. Треба да се знае дека јас на мојот грчки колега му испратив четири покани. Се надевам дека новите грчки раководители ќе ја почитуваат новата реалност како во однос на Македонија, така и кон другите соседи. На крајот ние посакуваме Грција да си го врати статусот на лидер во регионот“, истакнува Иванов.

Не е првпат претседателот Иванов во последниот изборен период во Грција, да упати апел до јужниот сосед за поодговорен однос за решавање на спорот за името, фокусирајќи ја одговорноста за успехот или пропаста на преговорите директно и единствено кај јужниот сосед.

„Со внимание го следиме сето она што се случува во Грција и очекуваме одговорно да се однесува, бидејки само така п��стои можност за решавање на спорот со името. Доколку новата грчка влада не се однесува одговорно, решавањето на спорот дополнително ќе се одлага“, изјави Иванов веднаш по изборите во Грција. Тој тогаш наведе дека Грција има обврски и кон нас со Времената спогодба, со рамката која е во Обединетите нации, па и со пресудата од Меѓународниот суд во Хаг.

„Доколку одговорно се однесува постои можност да се дојде до решение. Доколку не се однесува одговорно, повторно ќе се одлага процесот и ќе се бараат изговори“, порача претседателот.

Дали Андонис Самарас, лидерот на Нова демократија која победи на изборите во Грција ќе одговори на повикот за соработка и дали ќе се интензивираат средби на политичко ниво во нареднит период, се уште е рано да се предвиди. Но, според шефот на македонската државата, „имајќи ја предвид неговата биографија (на Самарас, н.з.) и што се' правел во животот и политиката, во иднина се е можно“.

Прашан за статуите на воини и херои, кои се издигнаа во центарот на Скопје, и ги разбрануваа духовите во Грција, претседателот е дециден дека станува збор за „зачувување на културното наслество“.

Иако, соседна Атина во нив препознава „непријателски гест“ и провокација, според Иванов нема ништо спорно во повеќеметарските статуи и скулптури во главниот град.

„Како членки на УНЕСКО, ние имаме обврска да го зачуваме, збогатиме и негуваме нашето културно богатство кое се наоѓа во нашата земја. Не можат да не обвинуваат за тоа дека регионот располага со толку големо историско наследство“, вели Иванов за Евроњуз. (Д.Т.)