Политика, и се' е можно! Црвенковски му го зеде менторот на Груевски

Поранешните премиери, чие жестоко политичко и идеолошко ривалство ги обележа почетоците на плурализмот, си подадоа рака за помирување и најавија сојузништво

Александра М. Митевска

Поранешниот премиер Љупчо Георгиевски, кој во 2003 година го напушти кормилото на ВМРО-ДПМНЕ, а пред неколку месеци ја презема лидерската позиција во вонпарламентарната ВМРО-Народна партија, прв пристигна вчера околу пладне во хотелот „Александар палас“, на многунајавуваната средба со неговиот главен политички противник од првата декада на плурализмот.

Пет минути подоцна дојде и поранешниот претседател на државата и премиер Бранко Црвенковски, кој во 2009 година се врати на чело на СДСМ, меѓу другото, поставувајќи си за цел да ја обедини опозицијата против Владата на ВМРО-ДПМНЕ и на ДУИ. Георгиевски се покажа како посакуван сојузник за таа агенда, поради тоа што во последните години неговото ривалство со социјалдемократите падна во сенка на несогласувања што искрснаа со премиерот Никола Груевски.

Овој пат ја немаше напрегнатоста која доминираше за време на изборната кампањата во 2002, кога Црвенковски го собори Георгиевски од премиерскиот трон. Атмосферата на оваа средба беше многу порелаксирана и од онаа пред околу 14 години, кога се одигра нивното последно телевизиско соочување како кандидати за премиер, а кое до ден денесе се раскажува поради личните дисквалификации што си ги разменија...

Поранешните премиери, вчера, срдечно се ракуваа, а по средбата зад затворени врати, што траеше помалку од еден час, изјавија дека меѓу нив се' уште има политички разлики, ама дека точките што ги спојуваат, во овој момент, се побројни и посуштински за ид��ината на државата.

„Во изминатите 20 години сме биле жестоки противници и за многу прашања сме имале спротивставени ставови, сме воделе тешки политички битки. Но, и тогаш имало ситуации, кога сме биле обврзани да соработуваме за прашања од големо значење, како референдумот за независноста во 1991 и донесувањето на Уставот, како и во широката владина коалиција за време на конфликтот во 2001“, рече Црвенковски. Потоа, тој оцени дека Македонија се соочува денес со исти тешки предизвици како во 1991 и 2001 и дека затоа имаат обврска да направат се' за државата, како што рече, да се врати на вистинскиот пат.

Георгиевски ги сублимираше во три најважни точки прашањата за кои се согласуваат со Црвенковски дека државата оди во погрешна насока: загрозена демократија, меѓународна изолација и економски дебакл.

Како едно од прашањата околу кои имаат разлики Црвенковски го спомена односот кон контроверзните личности од историјатот на македонската битка за самобитност. Конкретно, запрашан дали меѓу нив има договор за Тодор Александров, Црвенковски одговори: „За Александров имаме разлики во гледањата, меѓутоа поважно е тоа дека за Груевски и неговата погубна политика немаме разлики“.

Црвенковски и Георгиевски најавија дека во наредниот период ќе ја интензивираат комуникацијата и рекоа дека времето ќе покаже дали тоа ќе резултира и со формална предизборна коалиција. „Ова беше само почеток на еден процес и јас би рекол оптимистички почеток на тој процес“, оцени лидерот на СДСМ.

Теренот за оваа нивна средба очи в очи на јавна сцена, долго време се подготвуваше. Претходно, лидерот на СДСМ си подаде рака за помирување со раководството на ЛДП, старите и долгогодишни партнери на социјалдемократите. Потоа следуваше средба на Црвенковски со раководствата на идеолошки спротиставените Достоинство и Обединети за Македонија. Средбата со ВМРО-НП, иако беше последна, очекувано, предизвика најмногу внимание и најголеми реакции во јавноста.

Во 2006 година раководството на СДСМ го означи „флертот“ на тогашниот партиски лидер Владо Бучковски со ВМРО-НП како една од причините за изборниот пораз на партијата. Пред минатогодишните избори, пак, Георгиевски го навлече револтот на дел од членството на Народна, кога изјави дека СДСМ сега му е поблиска опција за соработка. Но, резултатите од ланските избори јасно покажаа дека самостојниот изборен настап на помалите партии значи само растурање на опозициските гласови во прилог на власта.

Познавачите на состојбите во двете партии сега не очекуваат поправените релации меѓу Црвенковски и Георгиевски да предизвикаат незадоволство кај нивното гласачко тело. Во изјава за Радио Слободна Европа, Бучковски оценува дека поддржувач��те на СДСМ позитивно ќе реагираат, бидејќи им требаат гласовите на помалите партии, ако сакаат да победат на изборите. Професорот Јове Кекеновски, пак, смета дека проблем може да бидат оние кои ќе се најдат „идеолошки затечени“ од новата коалиција, ама дека и на нив „ќе им се објасни“ дека спасувањето на Македонија е над се'.