29.08.2012, 14:08 „Гранит“ и „Бетон“ добија концесии за каменоломи
Два од вкупно седум договори за експлоатација на минералните суровини беа потпишани вчера во Минситертсвото за економија. Договорите се однесуваат на седум локации во исто толку општини, а нивната реализација се очекува да отвори по најмалку 80 до 100 нови работни места. Стручна комисија ги избрала компаниите, а меѓу нив, за каменоломи концесии добија „Гранит“ и „Бетон“.
„Вкупниот приход што избраните компании ќе го уплатат по основ на концесиски надоместок е 77 милиони денари од кои, согласно новиот Закон за минерални суровини, 78 отсто ќе бидат уплатени на сметката на општините, а останатите 22 процента во државниот буџет. Тоа директно ќе влијае врз зголемување на касата на локалните самоуправи“, изјави денеска министерот Ваљон Сарачини.
Според него, позначајни ќе бидат дологорочните ефекти од експлоатацијата на минералните суровини особено за градежниот сектор како еден од клучните мотори на економскиот раст. Но, битно е и тоа што приватните фирми го препознаваат потенцијалот на оваа индустрија, па и во време на криза вложуваат во неа.
Сарачини информира дека Владата веќе ги избрала и најдобрите понудувачи за 37-те нови локации за детални геолошки истражувања. Во фаза е и изготвување нови, уште 40 локации, за експлоатација на минерални суровини. Комапниите кои добија концесии го поздравија овој потег на Владата, посебно неговата брза реализација.
„Каменоломите се крвоток за една фирма како нашата. Тоа е основниот материјал што се употребува и во нискоградби и во високоградби. Би сакал геолошките истражувања да завршат побрзо, најскоро да се спроведе и постапката, да имаме доволно простор за купување нова опрема и за нови вработувања“, истакна директорот на „Гранит“ Страшо Милковски.
„Бетон“ до минатата година се занимаваше со нискоградба. Во меѓувреме купи комплетна опрема за асфалитрање. Сега, со тендерот на кој зема три каменолома, во Дојран, Оризари и Краста, ќе може да го заокружи производниот процес.
|
