Ван Ромпуј: Еврото е незаменливо

„Еврото е незаменливо“, изјави претседателот на Советот на Европската унија, Херман ван Ромпуј, најавувајќи промени во оригиналната структура на еврозоната.

Актуелната економска криза ја принуди Европа да ги признае недостатоците во структурата на еврозоната и да започне долг, но неопходен процес за промена на оригиналната „архитектура“ на еврозоната.

Претседателот на Советот на ЕУ, за време на неговата посета на Мадрид, ја претстави тезата на „четирите камен-темелници“, што треба да обезбеди создавање на посилна економска и монетарна унија, а која ќе ја елиминира опасноста од повторување на кризата во иднина.

„На прво место станува збор за создавање на т.нар. банкарска унија, со цел да се зајакне финансиската стабилност и да се спречат финансиските ризици за даночните обврзници. Второ е фискалната унија, што би ја препознала нашата длабока меѓусебна економска зависност. Потоа следат економската и политичката унија.“, соопшти Ван Ромпуј.

За да оствари официјална средба со шпанскиот премиерот, Мариано Рахој, претседателот на Советот на ЕУ, Херман Ван Ромпуј, вчера го прекина својот семеен одмор во Шпанија. На состанокот највисокиот европски претставник ги пофали „смелите и амбициозни мерки“ на Мадрид за реконструкција на фискалниот сектор на земјата.

„Фискалните и структурните реформи што се спроведуваат во Шпанија се тешки ако се гледаат краткорочно. На среден рок, тие ќе бидат оние кои ќе придонесат за економски раст и вработувањето во земјата“, рече Ван Ромпуј во Мадрид.

Шпанија, која се бори да ја сочува економијата на земјата од прелевањето на кризата од банкарскиот сектор, се соочува со уште еден предизвик на долгиот пат кон економско заздравување. И покрај големите долгови, регион Каталонија и официјално побара помош од шпанските власти во висина од пет милијарди евра.

Владата на оваа североисточна покраина, која оваа година треба да отплати долг од 40 милијарди евра, соопшти дека ќе побара средства од новоформираниот фонд за регионална ликвидност вреден 18 милијарди евра.

- Владата одлучи да побара средства од фондот за регионална ликвидност меѓутоа без прифаќање на политички услови, изјави портпаролот на каталонската влада Франсес Хомс.

Шпанскиот премиер Мариано Рахој изјави дека централната влада ќе и помогне на Каталонија.

- Ќе и помогнеме на Каталонија, како што им помагаме на сите други региони. Тие региони се дел од Шпанија, според тоа, шпанската Влада нема да ги мие рацете од своите региони, додаде Рахој.

Во исто време, аналитичарите веруваат дека и самата ќе мора во Шпанија, по помошта што ја доби за кризата во банкарскиот сектор, ќе побара помош за севкупниот економски сектор. Ова, пак, може да ги „исцрпи“ сите расположливи средства што еврозоната ги има за помош на своите членки со прекумерни долгови.