Мајка Тереза ќе го надвиши Александар

Фонтаната со споменик-скулптури и спомен-обележје со висина до 30 метри ќе се извиши во дворот на комплексот градска куќа со хотел што треба да се гради на местото на некогашниот Официрски дом. Ова е главната новина во последната верзија на урбанистичкиот план „Мал ринг“, кој Советот на Општина Центар го коригираше вчера по којзнае кој пат во последните две години. Општината, всушност, со оваа измена отстапи простор за изградба на ново споменично здание, кое доколку се изгради со максималната дозволена висина, ќе го надвиши „Воинот на коњ“. Неофицијално, тоа ќе биде споменикот на Мајка Тереза, кој е најавен како донација од Индија. ДУП-от предвидува споменикот со фонтаната да се гради на површина 680 квадратни метри.

Градоначалникот Владимир Тодоровиќ не можеше да потврди дека новата маркица за триесетметарскиот споменик е наменета за ликот на најголемата хуманистка.

„Се' уште не е потврдено и договорено дека тој простор ќе биде наменет за споменикот на Мајка Тереза. Постои уште една можна локација, а тоа е кај кружниот тек кај мостот ’Гоце Делчев’. Каде ќе се постави споменикот допрва ќе договориме со индиските донатори“, рече Тодоровиќ. (Дс.Т.)